ഏറ്റുമാനൂർ-ചിങ്ങവനം പാത ഇരട്ടിപ്പിക്കലിന്റെ ഭാഗമായി കോട്ടയം വഴിയുള്ള ടെയിൻ യാത്രയ്ക്ക് നിയന്ത്രണം. ഈ മാസം 28 വരെയാണ് നിയന്ത്രണം ഏർപ്പെടുത്തിയിരിക്കുന്നത്. പരശുറാം എക്പ്രസ്, കണ്ണൂർ-തിരുവനന്തപുരം ജനശതാബ്ദി അടക്കമുള്ള ചില ടെയിനുകൾ റദ്ദാക്കിയതായി റെയിൽവേ അറിയിച്ചു.
നാളെ മുതൽ കോട്ടയം റൂട്ടിൽ കടുത്ത നിയന്ത്രണമാണ്. 21 ട്രെയിനുകളാണ് സർവീസ് റദ്ദാക്കുന്നത്. കോട്ടയം വഴിയുള്ള ട്രെയിനുകൾ പകൽ ആലപ്പുഴ വഴി തിരിച്ചുവിടും. നാഗർ കോവിൽ- മംഗളൂരു പരശുറാം എക്‌സ്പ്രസ് 29 വരെ ഓടില്ല. ഹൈദരാബാദ്- തിരുവനന്തപുരം ശബരി എക്‌സ്പ്രസ് ഷൊർണൂർ വരെ സർവീസ് നടത്തും. ജനശതാബ്ദി, പരശുറാം അടക്കം 22 ട്രെയിൻ നാളെ മുതൽ സർവീസ് നടത്തില്ല.
പുനലൂർ-ഗുരുവായൂർ തീവണ്ടി നാളെ മുതൽ 28 വരെ റദ്ദാക്കി. തിരുവനന്തപുരം-ഷൊർണൂർ വേണാട് എക്‌സ്പ്രസ് മെയ് 24 മുതൽ 28 വരെ ഓടില്ല. കൊല്ലം-എറണാകുളം-കൊല്ലം മെമുവും 28 വരെ സർവീസ് നടത്തില്ല. മംഗളൂരു-നാഗർകോവിൽ പരശുറാം (16649) 20 മുതൽ 28 വരെ ഉണ്ടാകില്ല. നാഗർകോവിൽ-മംഗളൂരു പരശുറാം (16650) 21 മുതൽ 29 വരെയാണ് റദ്ദാക്കിയത്.
രാവിലെ 4.50-ന് കണ്ണൂരിൽനിന്ന് പുറപ്പെടുന്ന കണ്ണൂർ-തിരുവനന്തപുരം ജനശതാബ്ദി (12081) 21, 23, 24, 26, 27, 28 (ആറുദിവസം) തീയതികളിലും തിരുവനന്തപുരം-കണ്ണൂർ ജനശതാബ്ദി (12082) 22, 23, 25, 26, 27 (അഞ്ചുദിവസം) തീയതികളിലും ഓടില്ല.
സെക്കന്തരാബാദ്-തിരുവനന്തപുരം ശബരി എക്‌സ്പ്രസ് (17230) 23 മുതൽ 27 വരെ തൃശ്ശൂരിൽ സർവീസ് അവസാനിപ്പിക്കും. 11 മുതൽ 20 വരെ ഈ വണ്ടി ആലപ്പുഴവഴിയാണ്. തിരുവനന്തപുരം-സെക്കന്തരാബാദ് ശബരി എക്‌സ്പ്രസ് (17229) 24 മുതൽ 28 വരെ തൃശ്ശൂരിൽനിന്ന് സർവീസ് തുടങ്ങും.
21, 22 തീയതികളിൽ ഈ വണ്ടി ആലപ്പുഴ വഴി ഓടും. തിരുവനന്തപുരം-ന്യൂഡൽഹി കേരള എക്‌സ്പ്രസ് (12625) 12 മുതൽ 21 വരെയും 24 മുതൽ 28 വരെയും ആലപ്പുഴ വഴി സർവീസ് നടത്തും. 23 നാണ് പാതയിൽ സുരക്ഷാപരിശോധന നടക്കുക. 28 ന് വൈകീട്ടോടെ ഇരട്ടപ്പാത തുറക്കും.
