വിശാഖപട്ടണം: തെലുങ്കാന നിയമസഭാ തെരഞ്ഞെടുപ്പിലേക്ക് ആന്ധ്രപ്രദേശ് മുഖ്യമന്ത്രി എന്. ചന്ദ്രബാബു നായിഡു കോടികള് ഒഴുക്കുന്നുവെന്ന് വൈഎസ്ആര് കോണ്ഗ്രസ്. ചന്ദ്രബാബു നായിഡു കോണ്ഗ്രസുമായി ചേര്ന്ന് കോടികളാണ് തെരഞ്ഞെടുപ്പിനായി ചെലവഴിക്കുന്നതെന്ന് വൈഎസ്ആര് കോണ്ഗ്രസ് നേതാവും എംപിയുമായ വിജയ സായി റെഡ്ഡി പറഞ്ഞു. 1,200 കോടി രൂപയാണ് ഇത്തരത്തില് ചെലവഴിക്കുന്നത്. ഓരോ വോട്ടിനും 500 രൂപ വീതമാണ് ആന്ധ്ര ചെലവഴിക്കുന്നതെന്നും അദ്ദേഹം ആരോപിച്ചു.
ചന്ദ്രബാബു നായിഡു പണം തെലുങ്കാനയിലേക്ക് അയച്ചിരിക്കുന്നതിന്റെ മുഴുവന് വിവരങ്ങളും, വാഹനങ്ങളുടെ രജിസ്റ്റര് നന്പര് ഉള്പ്പെടെ തന്റെ പക്കലുണ്ടെന്നും റെഡ്ഡി പറഞ്ഞു. രാജേഷ്, ശ്രീനുവാസറാവു, ഗോപി, സുബറാവു എന്നിവരുടെ കൈയിലാണ് പണം നല്കിയതെന്നും അദ്ദേഹം പറഞ്ഞു.
2019ലെ ലോക്സഭാ തെരഞ്ഞെടുപ്പിനായി ചന്ദ്രബാബു കോണ്ഗ്രസിന് 5,000 കോടി രൂപയുടെ ധനസഹായമാണ് നല്കിയിരിക്കുന്നതെന്നും അദ്ദേഹം പറഞ്ഞു. കര്ണാടക തെരഞ്ഞെടുപ്പിലും ചന്ദ്രബാബു നായിഡു പണം ഒഴുക്കിയിരുന്നു. 500 കോടി രൂപയാണ് കര്ണാടകയില് അദ്ദേഹം മുടക്കിയത്. രാജസ്ഥാനിലും മധ്യപ്രദേശിലും 500 കോടി രൂപ വീതം ചന്ദ്രബാബു നായിഡു ചെലവഴിക്കുന്നുവെന്നും റെഡ്ഡി കൂട്ടിച്ചേര്ത്തു.