ന്യൂഡല്ഹി: കള്ളപ്പണം വെളുപ്പിച്ചെന്ന കേസില് അറസ്റ്റിലായി തിഹാര് ജയിലില് കഴിയുന്ന കോണ്ഗ്രസ് നേതാവ് ഡി.കെ ശിവകുമാറിനെ സോണിയ ഗാന്ധി സന്ദര്ശിച്ചു. ബുധനാഴ്ച രാവിലെ മുതിര്ന്ന നേതാവ് അംബിക സോണിക്കൊപ്പമാണ് കോണ്ഗ്രസ് അധ്യക്ഷ തിഹാര് ജയിലില് എത്തിയത്. ശിവകുമാറിന്റെ സഹോദരന് ഡി.കെ സുരേഷും ഇവര്ക്കൊപ്പമുണ്ടായിരുന്നു.
പാര്ട്ടി ശിവകുമാറിനൊപ്പമുണ്ടെന്നും എല്ലാ പിന്തുണയും അദ്ദേഹത്തിനുണ്ടാകുമെന്നും സോണിയ ഉറപ്പ് നല്കിയതായി സുരേഷ് മാധ്യമപ്രവര്ത്തകരോട് പറഞ്ഞു. കേസ് രാഷ്ട്രീയ പ്രേരിതമാണ്. ഡികെയെ മാത്രമല്ല കോണ്ഗ്രസിലെ മറ്റ് നേതാക്കളെയും ബിജെപി സര്ക്കാര് ലക്ഷ്യമിടുന്നുണ്ട്. നമ്മള് അവരോട് പൊരുതണം, ഇതില് നിന്നെല്ലാം പുറത്തുവരണം സോണിയ ഡികെയോട് പറഞ്ഞതായി സുരേഷ് മാധ്യമങ്ങളെ അറിയിച്ചു.