വരുന്ന തിങ്കളാഴ്ച വരെ സംസ്ഥാനത്തു വ്യാപക മഴയ്ക്കു സാധ്യതയുണ്ടെന്നു കാലാവസ്ഥ നിരീക്ഷണ കേന്ദ്രം. വെള്ളിയാഴ്ചയും ശനിയാഴ്ചയും ഒറ്റപ്പെട്ട സ്ഥലങ്ങളില് കനത്ത മഴയ്ക്കോ അതിതീവ്ര മഴയ്ക്കോ സാധ്യതയുണ്ട്.
വെള്ളിയാഴ്ച കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം ജില്ലകളിലും ശനിയാഴ്ച വയനാട് ജില്ലയിലും അതിതീവ്രമഴയ്ക്കു സാധ്യതയുള്ളതിനാല് ദുരന്ത നിവാരണ അതോറിറ്റി ഓറഞ്ച് അലര്ട്ട് പ്രഖ്യാപിച്ചു. അഞ്ചു ജില്ലകളിലും 24 മണിക്കൂറില് 20 സെന്റീമീറ്ററില്കൂടുതല് മഴ പെയ്യുമെന്നാണ് മുന്നറിയിപ്പ്. വെള്ളിയാഴ്ച തിരുവനന്തപുരം, ഇടുക്കി, തൃശൂര് ജില്ലകളിലും ശനിയാഴ്ച കൊല്ലം, ആലപ്പുഴ, എറണാകുളം, തൃശൂര്, പാലക്കാട്, മലപ്പുറം, കോഴിക്കോട്, കണ്ണൂര്, കാസര്ഗോഡ് ജില്ലകളിലും ഞായറാഴ്ച മലപ്പുറം, കോഴിക്കോട്, വയനാട്, കണ്ണൂര്, കാസര്ഗോഡ് ജില്ലകളില് എല്ലോ അലര്ട്ട് പ്രഖ്യാപിച്ചു. 24 മണിക്കൂറിനുള്ളില് ആറുമുതല് 11 വരെ സെന്റീമീറ്റര് മഴയാണ് പ്രവചിച്ചിട്ടുള്ളത്.
ശനിയാഴ്ച വരെ തെക്കുകിഴക്ക് അറബിക്കടല്, ലക്ഷദ്വീപ പ്രദേശം കേരള- കര്ണാടകതീരം എന്നിവിടങ്ങളില് മണിക്കൂറില് 40 മുതല് 50 വരെ കിലോമീറ്റര് വേഗതയില് ശക്തമായ കാറ്റിനു സാധ്യതയുണ്ട്. തിങ്കളാഴ്ചവരെ മധ്യ കിഴക്ക് അറബിക്കടലില് മണിക്കൂറില് 40 മുതല് 50വരെ കിലോമീറ്റര് വരെ വേഗതയില് ശക്തമായ കാറ്റിനു സാധ്യതയുണ്ട്.
തിങ്കളാഴ്ചവരെ വടക്ക് അറബിക്കടല്, ഗുജറാത്ത് തീരങ്ങളില് മണിക്കൂറില് 40 മുതല് 50 വരെ കിലോമീറ്റര് വേഗതയില് ശക്തമായ കാറ്റിനു സാധ്യതയുണ്ട്.