തമിഴ്നാട്, പുതുച്ചേരി എന്നിവിടങ്ങളിലെ നിയമസഭാ തെരഞ്ഞെടുപ്പിന്‍റെ പരസ്യപ്രചാരണം ഇന്ന് അവസാനിക്കും. കേരളത്തിനെപ്പം ആറാം തീയതിയാണ് ഇരു സംസ്ഥാനങ്ങളിലും തെരഞ്ഞെടുപ്പ്. തമിഴ്നാട്ടിലെ 234 സീറ്റുകളിലേക്കും പുതുച്ചേരിയില്‍ 30 സീറ്റുകളിലേക്കുമാണ് തെരഞ്ഞെടുപ്പ് നടക്കുന്നത്. തമിഴ്നാട്ടില്‍ എ.ഐ.ഡി.എം.കെ സഖ്യവും – ഡി.എം.കെ സഖ്യവും തമ്മിലാണ് പോരാട്ടം. പുതുച്ചേരിയില്‍ ഭരണത്തില്‍ തിരിച്ചെത്താനുള്ള അഭിമാന പോരാട്ടത്തിലാണ് കോണ്‍ഗ്രസിന്‍റെ നേതൃത്വത്തിള്ള യു.പി.എ സഖ്യം.
ബംഗാള്‍, അസം സംസ്ഥാനങ്ങളിലെ തെരെഞ്ഞെടുപ്പിന്‍റെ മൂന്നാംഘട്ട പരസ്യ പ്രചാരണവും ഇന്ന് അവസാനിക്കും. മൂന്നാംഘട്ടത്തോടെ ബംഗാള്‍ ഒഴികെ ഇത്തവണ തെരഞ്ഞെടുപ്പ് നടക്കുന്ന മറ്റ് സംസ്ഥാനങ്ങളിലെ വോട്ടെടുപ്പ് ആറാം തീയതി പൂര്‍ത്തിയാകും. ആദ്യ രണ്ടുഘട്ടങ്ങളില്‍ ഉണ്ടായ അക്രമസംഭവങ്ങളെ തുടര്‍ന്ന് ബംഗാളില്‍ സുരക്ഷ ശക്തമാക്കിയിട്ടുണ്ട്.
126 സീറ്റുകള്‍ ഉള്ള അസമിലെ 40 മണ്ഡലങ്ങളിലേക്കാണ് ആറാം തീയതി വോട്ടെടുപ്പ് നടക്കുക. ബംഗാളില്‍ ബി.ജെ.പി യും തൃണമൂല്‍ കോണ്‍ഗ്രസും, സി.പി.എം നേതൃത്വം നല്‍കുന്ന സംയുക്ത മോര്‍ച്ചയും നേരിട്ട് ഏറ്റുമുട്ടുന്ന 31 മണ്ഡലങ്ങളിലെ പരസ്യ പ്രചാരണവും ഇന്ന് അവസാനിക്കും. 294 സീറ്റുകളുള്ള ബംഗാളില്‍ എട്ട് ഘട്ടമായാണ് തെരഞ്ഞെടുപ്പ് നടക്കുന്നത്.
