വെല്ലിംഗ്ടണ്: രാജ്യത്തെ നടുക്കിയ ഭീകരാക്രമണത്തില് കൊല്ലപ്പെട്ടവരുടെ ഓര്മയില് ക്രൈസ്റ്റ്ചര്ച്ചില് ന്യൂസിലന്ഡ് ജനത ഒത്തുചേര്ന്നു. വെള്ളിയാഴ്ച പ്രാര്ഥനയ്ക്കായി രാജ്യത്തിനകത്തുനിന്നും പുറത്തുനിന്നുമായി ആയിരക്കണക്കിന് ആളുകളാണ് ക്രൈസ്റ്റ്ചര്ച്ചിലെ സെന്ട്രല് ഹാഗ്ലി പാര്ക്കില് ഒത്തുചേര്ന്നത്. പ്രധാനമന്ത്രി ജസീന്ഡ ആര്ഡേണും ചടങ്ങില് പങ്കെടുത്തു.
രാജ്യം ആകമാനം രണ്ടുമിനിട്ട് ദുഖാചരണം നടത്തുകയും ചെയ്തു. 42 പേര് കൊല്ലപ്പെട്ട അല്നൂര് മോസ്കിനു 500 മീറ്റര് മാത്രം മാറിയായിരുന്നു ചടങ്ങ് നടന്നത്. വെള്ളിയാഴ്ച പ്രാര്ഥനയ്ക്കുള്ള ആഹ്വാനം രാജ്യവ്യാപകമായി സംപ്രേഷണം ചെയ്തിരുന്നു. ദേശീയ ടെലിവിഷന് ചാനലിലൂടെയും റേഡിയോയിലൂടെയും ആണ് പ്രധാനമന്ത്രി ആഹ്വാനം നല്കിയത്.
വെള്ളിയാഴ്ച പ്രാര്ഥനയില് സംബന്ധിക്കാന് മുസ്ലിംകളല്ലാത്ത ആയിരക്കണക്കിന് ആളുകളും എത്തിയിരുന്നു. കനത്ത സുരക്ഷയിലാണ് ചടങ്ങ് നടന്നത്. രണ്ടു മോസ്കുകളും വെള്ളിയാഴ്ച പ്രാര്ഥനയ്ക്കായി ഇന്നു വീണ്ടും തുറന്നു. ഭൂരിഭാഗം ആളുകളും കൊല്ലപ്പെട്ട അല്നൂര് മോസ്കിലെ കേടുപാടുകള് തീര്ത്തു വീണ്ടും പെയിന്റടിച്ചു.
