ന്യൂയോര്ക്ക്: കേരളവും കര്ണാടകയും ഉള്പ്പെടെ ഇന്ത്യയില് തീവ്രവാദ സംഘടനയായ ഇസ്ലാമിക് സ്റ്റേറ്റ് ഉള്പ്പെടെയുള്ളവയുടെ ശക്തമായ സാന്നിധ്യമുണ്ടെന്നു യുഎന് റിപ്പോര്ട്ട്. ഐഎസ്, അല്ക്വയ്ദ, ഇവരുമായി ബന്ധമുള്ള വ്യക്തികള് തുടങ്ങിയവയെ കുറിച്ചു പ്രതിപാദിക്കുന്ന അനലിറ്റിക്കല് സപ്പോര്ട്ട് ആന്ഡ് സാംഗ്ഷന്സ് മോണിട്ടറിംഗ് ടീമിന്റെ റിപ്പോര്ട്ടിലാണ് ഇക്കാര്യം ചൂണ്ടിക്കാട്ടുന്നത്.
റിപ്പോര്ട്ട് അനുസരിച്ച് 2019 മേയ് പത്തിനു പ്രഖ്യാപിച്ച ഐഎസ് ഇന്ത്യന് അഫിലിയേറ്റില് (ഹിന്ദ് വിലയ) എന്ന ഭീകര സംഘടനയില് 180 മുതല് 200 വരെ അംഗങ്ങളുണ്ട്. ഇന്ത്യന് ഉപഭൂഖണ്ഡത്തിലെ അല്ക്വയ്ദ അഫ്ഗാനിസ്ഥാനിലെ നിമ്രൂസ്, ഹെല്മണ്ട്, കാണ്ഡഹാര് പ്രവിശ്യകളില്നിന്ന് താലിബാന്റെ കുടക്കീഴിലാണ് പ്രവര്ത്തിക്കുന്നത്. സംഘത്തില് ബംഗ്ലാദേശ്, ഇന്ത്യ, മ്യാന്മര്, പാക്കിസ്ഥാന് എന്നീ രാജ്യങ്ങളില്നിന്ന് ആളുകള് ചേര്ന്നു.
അന്തരിച്ച അസിം ഉമറിന്റെ പിന്ഗാമിയായ ഒസാമ മഹ്മൂദാണു സംഘടനയുടെ ഇപ്പോഴത്തെ നേതാവ്. അസിം ഉമര് കൊല്ലപ്പെട്ടതിനു പിന്നാലെയാണ് ഒസാമ മഹ്മൂദ് തലപ്പത്തെത്തിയത്. ഉമറിന്റെ മരണത്തിനു പകരം വീട്ടാന് മേഖലയില് ആക്രമണം നടത്താന് ഇവര് ഒരുങ്ങുന്നുവെന്നും റിപ്പോര്ട്ട് വ്യക്തമാക്കുന്നു.
ഇന്ത്യയില് ഒരു പുതിയ പ്രവിശ്യ സ്ഥാപിച്ചതായി കഴിഞ്ഞ വര്ഷം മേയില് ഇസ്ലാമിക് സ്റ്റേറ്റ് പ്രഖ്യാപിച്ചിരുന്നു. ഐഎസിന്റെ വാര്ത്താ ഏജന്സി എന്ന അറിയപ്പെടുന്ന അമാക് വഴിയായിരുന്നു പുതിയ ബ്രാഞ്ച് സംബന്ധിച്ച പ്രഖ്യാപനം നടത്തിയത്. എന്നാല് അവകാശവാദം മുതിര്ന്ന ജമ്മു കാഷ്മീര് പോലീസിലെ ഉന്നതര് നിരസിച്ചിരുന്നു.