കൊച്ചി മെട്രോയില്‍ പോലീസുകാര്‍ ടിക്കറ്റെടുക്കാതെ യാത്ര നടത്തിയെന്ന ആരോപണത്തില്‍ മെട്രോ അധികൃതര്‍ക്കെതിരേ പരാതിയുമായി കേരള പോലീസ് അസോസിയേഷന്‍. പോലീസുകാര്‍ ടിക്കറ്റെടുക്കാതെ യാത്ര നടത്തിയെന്ന ആരോപണങ്ങള്‍ അവാസ്തവമാണെന്നും വിവിധ സ്റ്റേഷനുകളില്‍ ഡ്യൂട്ടിക്കു നിയോഗിച്ച പോലീസുകാര്‍ക്ക് ആ സ്റ്റേഷനുകളിലെത്താന്‍ മെട്രോയല്ലാതെ മറ്റു മാര്‍ഗങ്ങളില്ലെന്നും ഇതിനാലാണ് മെട്രോയില്‍ യാത്ര ചെയ്തതെന്നും പോലീസ് അസോസിയേഷന്‍ വിശദീകരിച്ചു.
ഇക്കാര്യത്തില്‍ വസ്തുതകള്‍ പരിശോധിക്കാതെയാണ് മെട്രോ അധികൃതര്‍ പരാതി നല്‍കിയതെന്നും ഇതിനെതിരേ മുഖ്യമന്ത്രിക്കു പരാതി നല്‍കുമെന്നും പോലീസ് അസോസിയേഷന്‍ വ്യക്തമാക്കി.
കൊച്ചി മെട്രോയില്‍ പൊലീസുകാര്‍ ടിക്കറ്റെടുക്കാതെ യാത്ര ചെയ്യുന്നതായി കെഎംആര്‍എല്‍ ആരോപിച്ചിരുന്നു. ഇക്കാര്യത്തില്‍ നടപടി സ്വീകരിക്കണമെന്ന് ആവശ്യപ്പെട്ട് കെഎംആര്‍എല്‍ ഫിനാന്‍സ് ഡയറക്ടര്‍ എറണാകുളം റേഞ്ച് ഐജിക്ക് പരാതി നല്‍കി. ടിക്കറ്റെടുക്കാതെ പൊലീസുകാര്‍ മാത്രമല്ല സുഹൃത്തുക്കളെയും കൊണ്ടുപോകുന്നതായി പരാതിയിലുണ്ട്.
