തളിപ്പറമ്പ്‌: വയല്‍ക്കിളികളുടെയും സിപിഎം നേതൃത്വത്തിലുള്ള കീഴാറ്റൂര്‍ സംരക്ഷണ ജനകീയ സമിതിയുടെയും മാര്‍ച്ചിന്‍റെ പശ്ചാത്തലത്തില്‍ ക്രമസമാധാനപ്രശ്നം ഒഴിവാക്കാന്‍ ജില്ല ഭരണകൂടം തിരിക്കിട്ട ചര്‍ച്ച തുടങ്ങി. ഇന്നു വൈകുന്നേരമാണ് കീഴാറ്റൂരില്‍നിന്ന് തളിപ്പറമ്പ്‌ ടൗണിലേക്ക് സിപിഎമ്മിന്‍റെ ജനജാഗ്രതാ മാര്‍ച്ചും തുടര്‍ന്ന് ജനകീയ കൂട്ടായ്മയും നടക്കുന്നത്.
ഞായറാഴ്ച വൈകുന്നേരം വയല്‍ക്കിളികള്‍ക്കു പിന്തുണയുമായി കീഴാറ്റൂര്‍ ഐക്യദാര്‍ഢ്യ സമരസമിതിയുടെ നേതൃത്വത്തില്‍ തളിപ്പറമ്പില്‍നിന്നു കീഴാറ്റൂരിലേക്കും മാര്‍ച്ച്‌ സംഘടിപ്പിച്ചിട്ടുണ്ട്. ഇരുവിഭാഗത്തിന്‍റെയും മാര്‍ച്ചിന്‍റെ പശ്ചാത്തലത്തില്‍ കീഴാറ്റൂര്‍ ഗ്രാമം ഇന്നു രാവിലെ മുതല്‍ സായുധ പോലീസ് വലയത്തിലാണ്.
അതിനിടെ, കീഴാറ്റൂരില്‍ നിരോധനാജ്ഞ പ്രഖ്യാപിച്ചു വയല്‍ക്കിളി സമരത്തെ പ്രതിരോധിക്കാന്‍ നീക്കം നടക്കുന്നതായി സൂചനയുണ്ട്. ഈ സാഹചര്യത്തില്‍ വിവാദമായ കീഴാറ്റൂര്‍ വയലിലേക്ക് ആളുകള്‍ പ്രവേശിക്കുന്നത് തടഞ്ഞുകൊണ്ടുള്ള ഉത്തരവ് ജില്ലാ കളക്ടര്‍ പുറപ്പെടുവിച്ചേക്കുമെന്നാണ് സൂചന.
