കോഴിക്കോട്: സംസ്ഥാനത്ത് മേയ് 30 വരെ ലോക്ഡൗണ്‍ നീട്ടിയ സാഹചര്യത്തിലും തുടര്‍ച്ചയായി മൂന്നാഴ്ചയിലധികമായി വ്യാപാര സ്ഥാപനങ്ങള്‍ അടച്ചിടേണ്ടി വന്നതിനാലും വ്യാപാരിസമൂഹം കടുത്ത ആശങ്കയിലും പ്രതിസന്ധിയിലുമാണെന്നും ദുരിതമനുഭവിക്കുന്ന വ്യാപാര മേഖലയ്ക്ക് ലോക്ഡൗണില്‍ ഇളവ് അനുവദിക്കണമെന്നും കേരള വ്യാപാരി വ്യവസായി ഏകോപന സമിതി സംസ്ഥാന സെക്രട്ടേറിയറ്റ്‌ യോഗം ആവശ്യപ്പെട്ടു. ഓണ്‍ലൈന്‍ യോഗത്തില്‍ സംസ്ഥാന പ്രസിഡന്‍റ് ടി.നസിറുദ്ദീന്‍ അധ്യക്ഷത വഹിച്ചു.
ലോക്ഡൗണ്‍ നാളുകളില്‍ അവശ്യസര്‍വീസ് കൂടാതെ മറ്റു വ്യാപാര സ്ഥാപനങ്ങളും ആഴ്ചയില്‍ മൂന്നു ദിവസമെങ്കിലും തുറക്കാന്‍ അനുവദിക്കണമെന്നും പൊതുജനങ്ങളുമായി ഏറ്റവും കൂടുതല്‍ ഇടപഴകുന്ന വിഭാഗമായ വ്യാപാരികളെ കോവിഡ് വാക്സിനേഷന്‍റെ മുന്‍ഗണനാ പട്ടികയില്‍ ഉള്‍പ്പെടുത്തണമെന്നും, തദ്ദേശ-സ്വയംഭരണ സ്ഥാപനങ്ങളുടെയും, വിവിധ കോര്‍പറേഷനുകളുടെയും കീഴിലുള്ള കെട്ടിടങ്ങളിലെ ലോക്ഡൗണ്‍ കാലത്തെ വാടക ഒഴിവാക്കിയത് പോലെ എല്ലാ സ്വകാര്യ വ്യക്തികളുടെ കെട്ടിടങ്ങളുടെയും കടമുറികളുടെയും ഒരു മാസത്തെ വാടക ഒഴിവാക്കാന്‍ നടപടികള്‍ സ്വീകരിക്കണമെന്നും സംസ്ഥാന ജനറല്‍ സെക്രട്ടറി രാജു അപ്സര ആവശ്യപ്പെട്ടു.
കൂടാതെ ഡി ആന്‍ഡ് ഒ ലൈസന്‍സ് ഉള്‍പ്പെടെ വിവിധ ലൈസന്‍സുകള്‍ പുതുക്കുന്നതിന് പിഴയില്ലാതെ ആറു മാസത്തെ കാലാവധി അനുവദിക്കുക, ജിഎസ്ടി റിട്ടേണ്‍ സമര്‍പ്പിക്കുന്നതിനു സാവകാശം നല്‍കുകയും തീയതി നീട്ടി നല്‍കുകയും ചെയ്യുക, എല്ലാത്തരം നികുതികള്‍ക്കും ഇളവ് അനുവദിക്കുക, വൈദ്യുതിചാര്‍ജില്‍ പ്രത്യേക ഇളവുകള്‍ നല്‍കുക, ബില്‍ അടയ്ക്കുന്നതിനുള്ള തീയതി നീട്ടി നല്‍കുക തുടങ്ങിയ ആവശ്യങ്ങള്‍ ഉന്നയിച്ചുകൊണ്ട് മുഖ്യമന്ത്രിക്ക് നിവേദനം നല്‍കാനും യോഗം തീരുമാനിച്ചു.
