ലക്നോ: ഉത്തര്‍പ്രദേശില്‍ ഉന്നാവോയില്‍ പ്രായപൂര്‍ത്തിയാകാത്ത പെണ്‍കുട്ടിയെ ബിജെപി എംഎല്‍എ കുല്‍ദീപ് സിംഗ് സെന്‍ഗര്‍ മാനഭംഗപ്പെടുത്തിയെന്ന് സിബിഐ സ്ഥിരീകരിച്ചു. കഴിഞ്ഞ വര്‍ഷം ജൂണ്‍ നാലിന് പെണ്‍കുട്ടിയെ കുല്‍ദീപ് തന്‍റെ വസതിയില്‍വച്ചാണ് മാനഭംഗപ്പെടുത്തിയതെന്നും സിബിഐ വ്യക്തമാക്കി. തന്‍റെ വനിത സഹായിയെ മുറിയുടെ മുന്നില്‍ കാവല്‍ നിറുത്തിയശേഷമാണ് കുല്‍ദീപ് പെണ്‍കുട്ടിയെ മാനഭംഗപ്പെടുത്തിയതെന്നും സിബിഐ റിപ്പോര്‍ട്ടിലുണ്ട്.
മജിസ്ട്രേറ്റിന്‍റെ സാന്നിധ്യത്തിലാണ് സിബിഐ പെണ്‍കുട്ടിയുടെ മൊഴിയും രേഖപ്പെടുത്തി. പെണ്‍കുട്ടിയെ വൈധ്യപരിശോധനയ്ക്ക് വിധേയമാക്കുന്നത് പോലീസ് വൈകിപ്പിച്ചുവെന്നും സിബിഐ ഉദ്യോഗസ്ഥര്‍ പറഞ്ഞു.
ജോലി വാഗ്ദാനം ചെയ്താണ് പെണ്‍കുട്ടിയെ എംഎല്‍എയുടെ വസതിയില്‍ എത്തിച്ചതെന്നും തുടര്‍ന്നു എംഎല്‍എയും സുഹൃത്തുകളും നിരവധി തവണ പെണ്‍കുട്ടിയെ മാനഭംഗത്തിനിരയാക്കിയെന്നും സിബിഐ റിപ്പോര്‍ട്ടില്‍ പറയുന്നു. സംഭവത്തില്‍ കേസെടുക്കാന്‍ പോലീസ് തയാറായില്ലെന്നും പ്രതിയെ രക്ഷിക്കാന്‍ പോലീസ് ശ്രമിച്ചുവെന്നും സിബിഎെ വ്യക്തമാക്കി.
