ഇന്ത്യയിൽ ആദ്യത്തെ കോവിഡ് കേസ് സ്ഥിരീകരിച്ചതിന്‍റെ രണ്ടാംവാർഷികം നാളെ. 2020 ജനുവരി 31നാണ് ഇന്ത്യയിൽ ആദ്യമായി കോവിഡ് കേസ് തൃശൂരിൽ സ്ഥിരീകരിച്ചത്. ചൈനയിലെ വുഹാൻ മെഡിക്കൽ സർവകലാശാലയിലെ ഒന്നാംവർഷ എംബിബിഎസ് വിദ്യാർഥിനിയായ മതിലകം സ്വദേശിനിയായിരുന്നു രോഗി. ഡോക്ടർ ആകാനുള്ള അവസാനഘട്ട പരീക്ഷകളുടെ തിരക്കിലാണിപ്പോൾ ഈ പെൺകുട്ടി.
ചൈനയിൽ കോവിഡ് വ്യാപിച്ചതോടെ നാട്ടിൽ തിരിച്ചെത്തിയതിനു തൊട്ടുപിന്നാലെയാണ് വിദ്യാർഥിനിക്കു കോവിഡ് സ്ഥിരീകരിച്ചത്. ചൈനയിലേക്കു തിരിച്ചുപോകാൻ പിന്നീട് ഇവർക്കു സാധിച്ചിട്ടില്ല. മറ്റു രാജ്യങ്ങളിൽനിന്നുള്ളവർക്കു ചൈന ഏർപ്പെടുത്തിയ വിലക്ക് ഇപ്പോഴും തുടരുന്നതിനാൽ ഈ വിദ്യാർഥിനിയടക്കം തൃശൂരിലും കേരളത്തിന്‍റെ വിവിധ ജില്ലകളിലുമുള്ള നിരവധി മെഡിക്കൽ വിദ്യാർഥികൾക്കു വുഹാൻ സർവകലാശാലയിലേക്കു തിരിച്ചുപോകാൻ സാധിച്ചിട്ടില്ല. എന്നാൽ, ഓണ്‍ലൈൻവഴി ക്ലാസുകളും പരീക്ഷകളും നടത്തി വുഹാൻ സർവകലാശാല കോഴ്സുകൾ പൂർത്തീകരിച്ചുവരികയാണ്.
