ഓണ്ലൈന് മോഹിനിയാട്ടം അവതരിപ്പിക്കാന് കലാഭവന് മണിയുടെ സഹോദരനും നര്ത്തകനുമായ ആര്.എല്.വി രാമകൃഷ്ണന് സംഗീത നാടക അക്കാദമി അവസരം നല്കിയില്ലെന്ന വിവാദത്തില് പ്രതികരണവുമായി അധ്യക്ഷ കെ.പി.എ.സി ലളിത. ആര്.എല്.വി രാമകൃഷ്ണന് പറഞ്ഞതാണ് ശരിയെന്ന് കെ.പി.എ.സി ലളിത പറഞ്ഞതായി മാധ്യമങ്ങള് റിപ്പോര്ട്ട് ചെയ്തു. ഈ വിഷയത്തില് കൂടുതല് പ്രതികരിക്കാനില്ലെന്നും ലളിത വ്യക്തമാക്കി.കെ.പി.എ.സി ലളിതയെ കൊണ്ട് സംഗീത നാടക അക്കാദമി സെക്രട്ടറി രാധാകൃഷ്ണന് നായര് നുണ പറയിപ്പിച്ചതാണെന്നും പ്രശ്നങ്ങള്ക്കെല്ലാം കാരണം സെക്രട്ടറിയുടെ ഏകാധിപത്യ സ്വഭാവമാണെന്നും കഴിഞ്ഞ ദിവസം രാമകൃഷ്ണന് ആരോപിച്ചിരുന്നു.ആവശ്യമായ യോഗ്യതകളുണ്ടെന്ന് ബോധ്യമുള്ളതുകൊണ്ടാണ് ഓണ്ലൈന് പരിപാടിക്ക് അപേക്ഷിച്ചത്. ഫോണിലൂടെ ബന്ധപ്പെട്ടപ്പോള് ലളിതച്ചേച്ചി ശരിയാക്കാമെന്ന് പറഞ്ഞിരുന്നു. എന്നാല്, സെക്രട്ടറിയാണ് എതിരുനിന്നത്.മോഹിനിയാട്ടം സ്ത്രീകളുടെ ഇനമാണെന്നും രാമകൃഷ്ണന് പരിപാടി അവതരിപ്പിച്ചാല് അക്കാദമിയുടെ നിലവാരം പോകുമെന്നും നാലു വര്ഷത്തെ അക്കാദമി ഭരണത്തിന്റെ പേര് നഷ്ടമാകുമെന്നും ലളിത ചേച്ചിയെ കൊണ്ട് സെക്രട്ടറി പറയിപ്പിക്കുകയായിരുന്നു.ഇതോടെ മാനസികമായി വല്ലാതെ തകര്ന്നു. സഹോദരിയെപ്പോലെയും അമ്മയെപ്പോലെയും സ്നേഹിക്കുന്ന ലളിതച്ചേച്ചി കൂറുമാറിയത് ഞെട്ടിച്ചു. മാനസികമായ ആഘാതം സഹിക്കാനാവാത്തതിനെ തുടര്ന്നാണ് ആത്മഹത്യക്ക് ശ്രമിച്ചതെന്നും രാമകൃഷ്ണന് പറയുന്നു.
FLASHNEWS