ബെംഗളൂരു: പി ഡി പി ചെയര്മാന് അബ്ദുന്നാസിര് മഅ്ദനിയെ മുസ്ലിം ലീഗ് യൂത്ത് ലീഗ് നേതാക്കള് സന്ദര്ശിച്ചു. ബംഗളൂരുവിലെ വീട്ടിലാണ് ലീഗ് നേതാക്കള് സന്ദര്ശിച്ചത്. മുസ്ലിം ലീഗ് സംസ്ഥാന ജനറല് സെക്രട്ടറി പി.എം.എ സലാം, യൂത്ത് ലീഗ് ദേശീയ കമ്മറ്റി അംഗം ഷിബു മീരാന്, എം.കെ നൗഷാദ്, എം.എ അമീറലി, അബ്ദുല് നാസര് തുടങ്ങിയവരാണ് സംഘത്തിലുണ്ടായിരുന്നത്.
വിചാരണത്തടവുകാരനായി നീണ്ട കാലം ജയില്വാസം അനുഭവിച്ചതിന് ശേഷം ആരോഗ്യ പ്രശനങ്ങളെ തുടര്ന്ന് നിലവില് ജാമ്യത്തിലാണ് അബ്ദുന്നാസിര് മഅ്ദനി. ദീര്ഘനാളത്തെ ആശുപത്രിയിലെ ചികിത്സക്ക് ശേഷം അദ്ദേഹത്തെ വീട്ടിലേക്ക് മാറ്റുകയായിരുന്നു. ഗുരുതര ആരോഗ്യ പ്രശ്നങ്ങള് അലട്ടുന്ന അദ്ദേഹത്തിന് ചികിത്സ തുടരുന്നുണ്ട്.
ഏതാനും ദിവസങ്ങള്ക്ക് മുമ്ബ് സമസ്ത കേരള ജംഇയ്യത്തുല് ഉലമ ജനറല് സെക്രട്ടറി പ്രഫ. കെ. ആലിക്കുട്ടി മുസ്ലിയാര് മഅ്ദനിയെ സന്ദര്ശിച്ചിരുന്നു. എസ്.വൈ.എസ് ബംഗളൂരു ജില്ല ജനറല് സെക്രട്ടറി പി.എം. അബ്ദുല് ലത്തീഫ് ഹാജി, താഹിര് മിസ്ബാഹി, റമീസ് കമ്മനഹള്ളി, ശുക്കൂര് മൊയ്തു തുടങ്ങിയവരോടൊപ്പമായിരുന്നു ആലിക്കുട്ടി മുസ്ലിയാര് മഅ്ദനിയെ കണ്ടത്.