ന്യൂഡല്ഹി: മനുഷ്യരില് കോവിഡ് വാക്സിന് അവസാനഘട്ട പരീക്ഷണങ്ങള് നടത്താന് സെറം ഇന്സ്റ്റിറ്റ്യൂറ്റിന് അനുമതി. ഓക്സ്ഫഡ് വാക്സിന് ഉപയോഗിച്ചുള്ള രണ്ട്, മൂന്ന് ഘട്ട പരീക്ഷണങ്ങള് നടത്താനാണു ഡ്രഗ്സ് കണ്ട്രോളര് ജനറല് ഓഫ് ഇന്ത്യ (ഡിസിജിഐ) അനുമതി നല്കിയത്.
വിദഗ്ധ സമിതിയുടെ വിശദമായ വിലയിരുത്തലിനു ശേഷമാണു ഞായറാഴ്ച രാത്രിയോടെ ഡിസിജിഐ ഡയറക്ടര് ഡോ. വി.ജി. സോമാനി അനുമതി നല്കിയതെന്നു പിടിഐ വാര്ത്താ ഏജന്സി റിപ്പോര്ട്ട് ചെയ്യുന്നു. വാക്സിന്റെ ആദ്യഘട്ട പരീക്ഷണങ്ങള് വിജയകരമായിരുന്നു. ഏകദേശം 1600 പേരില് രണ്ട്, മൂന്ന് ഘട്ട പരീക്ഷണങ്ങള് നടത്താനാണു തീരുമാനം.
പരീക്ഷണത്തിന് വിധേയരാകുന്നവര്ക്ക് ഓരോ ഡോസ് വാക്സിന് വീതം നാലാഴ്ചത്തെ ഇടവേളയില് നല്കും. തുടര്ന്ന് സുരക്ഷ സംബന്ധിച്ചും രോഗപ്രതിരോധ ശേഷി സംബന്ധിച്ചുമുള്ള വിലയിരുത്തല് നടത്തും. ഡല്ഹി എയിംസ് ഉള്പ്പെടെ 17 കേന്ദ്രങ്ങളിലായി തെരഞ്ഞെടുക്കപ്പെട്ടവരിലാണ് പരീക്ഷണം നടത്തുക. 18 വയസിന് മുകളിലുള്ളവരാണിവര്.
ഓക്സ്ഫഡ് യൂണിവേഴ്സിറ്റിയുമായി ചേര്ന്ന് വാക്സിന് നിര്മാണത്തില് പങ്കാളികളായ സ്വീഡിഷ്-ബ്രിട്ടീഷ് കന്പനിയായ ആസ്ട്രസെനക്കയുമായാണ് സെറം ഇന്സ്റ്റിറ്റ്യൂട്ട് കൈകോര്ത്തിരിക്കുന്നത്. നിലവിലെ ഗവേഷണങ്ങളും റിസള്ട്ടുകളും എല്ലാം ശരിയായി നടക്കുന്നുവെങ്കില് കോവിഡ് വാക്സിന് ഒക്ടോബറില് വിതരണത്തിനെത്തുമെന്നാണ് ശാസ്ത്രജ്ഞര് കരുതുന്നത്.