വിഴിഞ്ഞത്തെ സമരവുമായി ബന്ധപ്പെട്ട അദാനി ഗ്രൂപ്പ് നല്കിയ കോടതിയലക്ഷ്യ ഹര്ജി ഇന്ന് വീണ്ടും ഹൈക്കോടതി പരിഗണിക്കും.
തുറമുഖ നിര്മ്മാണത്തിന് സംസ്ഥാന പോലീസ് സുരക്ഷ ഒരുക്കാനുള്ള കോടതി ഉത്തരവ് നടപ്പാക്കിയില്ലെന്നാണ് അദാനി ഗ്രൂപ്പിന്റെ പ്രധാന പരാതി. ഉത്തരവ് നിലനില്ക്കെ വീണ്ടും സംഘര്ഷം ഉണ്ടാക്കി എന്നും കേന്ദ്രസേനയുടെ സംരക്ഷണം ഇല്ലാതെ നിര്മ്മാണം മുന്നോട്ട് കൊണ്ടുപോകാന് ആകില്ലെന്നും ഹര്ജിക്കാര് കോടതി അറിയിച്ചിരുന്നു.
തുറമുഖ പ്രദേശമടങ്ങുന്ന അതീവ സുരക്ഷാ മേഖല കേന്ദ്ര സേനയ്ക്ക് കൈമാറുന്നതില് കോടതി കേന്ദ്ര സര്ക്കാരിന്റെ നിലപാട് തേടിയിട്ടുണ്ട്. നിര്മ്മാണ പ്രദേശത്തിനകത്ത് കേന്ദ്ര സേന സുരക്ഷ ഒരുക്കുന്നതില് എതിര്പ്പില്ലെന്നു സംസ്ഥാന സര്ക്കാരും കോടതിയില് അറിയിച്ചിട്ടുണ്ട്. എന്നാല് സമരം ഒത്തുതീര്പ്പ് ആയ സാഹചര്യത്തില് സര്ക്കാര് ഇന്ന് കോടതിയില് സ്വീകരിക്കുന്ന നിലപാടും നിര്ണ്ണായകമാകും.