നീറ്റ്-യുജി പരീക്ഷയുടെ പുതുക്കിയ ഫലം ഇന്ന് പ്രസിദ്ധീകരിക്കും. തർക്കമുണ്ടായിരുന്ന ഫിസിക്സ് പേപ്പറിലെ ചോദ്യത്തിന് ഐഐടി ഡല്‍ഹിയിലെ വിദഗ്‌ധർ കണ്ടെത്തിയ ഉത്തരത്തിന്റെ അടിസ്ഥാനത്തില്‍ ഫലം പുതുക്കിയതോടെ ഏതാണ്ട് 4.2 ലക്ഷം വിദ്യാർത്ഥികളുടെ ഫലത്തില്‍ മാറ്റംവന്നതായതാണ് എൻ.ടി.എ വൃത്തങ്ങള്‍ അറിയിക്കുന്നത്.
ഇതോടെ ഈ വർഷത്തെ നീറ്റ്-യുജി പരീക്ഷയില്‍ ഒന്നാം റാങ്ക് ലഭിച്ചവരുടെ എണ്ണം 61-ല്‍ നിന്ന് 17 ആയി കുറയും. 4.2 ലക്ഷം വിദ്യാർത്ഥികളുടെ റാങ്കില്‍ മാറ്റം ഉണ്ടാകുമെങ്കിലും അത് ഏറ്റവുമധികം ബാധിക്കുന്നത് ആദ്യത്തെ ഒരു ലക്ഷത്തിനകത്ത് റാങ്ക് ലഭിച്ചവരെയാണ്.ആദ്യം പ്രസിദ്ധീകരിച്ച ഫലത്തില്‍ 61 വിദ്യാർത്ഥികള്‍ക്കാണ് മുഴുവൻ മാർക്കായ 720 ലഭിച്ചിരുന്നത്.
എന്നാല്‍, ഇതില്‍ 44 പേര് ഫിസിക്സ് പേപ്പറിലെ തർക്കമുണ്ടായിരുന്ന ചോദ്യത്തിന് രേഖപ്പെടുത്തിയത് തെറ്റായ ഉത്തരമാണെന്നാണ് ഐഐടി ഡല്‍ഹിയുടെ റിപ്പോർട്ട്. 44 പേരുടെ മാർക്ക് 720-ല്‍ നിന്ന് 715 ആയി കുറഞ്ഞു.
ആദ്യ റാങ്ക് പട്ടികയില്‍ 50,000 -നും ഒരു ലക്ഷത്തിനും ഇടയില്‍ റാങ്ക് ലഭിച്ചവരില്‍ 16,000 പേര് തെറ്റായ ഉത്തരമാണ് രേഖപ്പെടുത്തിയത്. ഇവർക്ക് ആദ്യം ലഭിച്ച മാർക്ക് നഷ്ടമാകുന്നതോടെ ലഭിച്ച റാങ്കിലും മാറ്റമുണ്ടാകും. മുഴുവൻ സർക്കാർ മെഡിക്കല്‍ കോളേജുകളിലായി ആകെയുള്ളത് 56,000 സീറ്റുകളാണ്.
ആദ്യ റാങ്കുകളില്‍ ഉണ്ടാകുന്ന മാറ്റം മികച്ച സർക്കാർ മെഡിക്കല്‍ കോളേജുകളില്‍ പ്രവേശനം ഉറപ്പിച്ചിരുന്ന പലരുടെയും സാധ്യതകളില്‍ മാറ്റംവരുത്തിയേക്കും.
ഫിസിക്സ് പേപ്പറിലെ തർക്കമുണ്ടായിരുന്ന ചോദ്യത്തിന് ഉത്തരമായി ഓപ്‌ഷൻ രണ്ടോ നാലോ രേഖപെടുത്തിയിരുന്നവർക്ക് മുഴുവൻ മാർക്കും നേരത്തെ നല്‍കിയിരുന്നു. എന്നാല്‍, ഓപഷൻ നാലാണ് ശരിയുത്തരമെന്ന് ഐഐടി കണ്ടെത്തിയിരുന്നു.
ഇതേത്തുടർന്ന് ഓപ്‌ഷൻ രണ്ട് രേഖപ്പെടുത്തിയവർക്ക് ശരിയുത്തരത്തിന് ലഭിച്ച നാല് മാർക്ക് നഷ്ടമാകുകയും തെറ്റായ ഉത്തരത്തിന് ഒരു നെഗറ്റീവ് മാർക്ക് ലഭിക്കുകയും ചെയ്തു. ഇതാണ് ഫലത്തില്‍ വലിയ മാറ്റമുണ്ടാകാൻ കാരണം.
