ലോകകപ്പിന് മാച്ച്‌ ടിക്കറ്റും വിമാനയാത്ര ടിക്കറ്റും താമസസൗകര്യവും ഉള്‍പ്പെടെയുള്ള ഗ്രൂപ് പാക്കേജ് അവതരിപ്പിച്ച്‌ ഖത്തര്‍ എയര്‍വേസ്.ലോകത്തിന്‍റെ ഏത് ഭാഗത്തുനിന്നും ഖത്തറില്‍ കളി കാണാന്‍ എത്തുന്ന ആരാധകര്‍ക്ക് യാത്രയും താമസവും മത്സര ടിക്കറ്റും വാഗ്ദാനംചെയ്യുന്ന ഓഫറുമായാണ് ഖത്തര്‍ എയര്‍വേസ് ആരാധകര്‍ക്ക് മികച്ച പാക്കേജ് അവതരിപ്പിക്കുന്നത്.
qatarairways.com/FIFA2022 എന്ന ലിങ്ക് വഴി, ഇഷ്ട ടീമിനെ തിരഞ്ഞെടുപ്പ് വൈവിധ്യമാര്‍ന്ന പാക്കേജുകളില്‍ ടിക്കറ്റ് ബുക്ക് ചെയ്യാം. നവംബര്‍ 20 മുതല്‍ ഡിസംബര്‍ മൂന്ന് വരെയുള്ള ടീം പാക്കേജ്, നവംബര്‍ 20 മുതല്‍ 27 വരെയുള്ള മൂന്ന് മത്സരങ്ങളുള്ള ഗ്രൂപ് പാക്കേജ്, നവംബര്‍ 27 മുതല്‍ ഡിസംബര്‍ മൂന്നുവരെ മൂന്ന് മത്സരങ്ങളുള്ള ലേറ്റര്‍ ഗ്രൂപ് പാക്കേജ്, ഡിസംബര്‍ മൂന്ന് മുതല്‍ ഏഴ് വരെയുള്ള പ്രീക്വാര്‍ട്ടര്‍ പാക്കേജ് (രണ്ട് മത്സരം), ഡിസംബര്‍ ഏഴ് മുതല്‍ 11 വരെയുള്ള ക്വാര്‍ട്ടര്‍ ഫൈനല്‍ പാക്കേജ് (രണ്ട് മത്സരം), ഡിസംബര്‍ 11 മുതല്‍ 19 വരെയുള്ള ഫൈനല്‍ റൗണ്ട് പാക്കേജ് (മൂന്ന് മത്സരം), 15 മുതല്‍ 19 വരെ ഫൈനല്‍ പാക്കേജ് (രണ്ട് മത്സരം) എന്നിവയാണ് ആരാധകര്‍ക്കായി നല്‍കുന്നത്.
കഴിഞ്ഞ സെപ്റ്റംബറിലാണ് ആരാധകര്‍ക്കായി ഖത്തര്‍ എയര്‍വേസ് മള്‍ട്ടി പാക്കേജ് ആരംഭിച്ചത്. നിലവില്‍ മാച്ച്‌ ടിക്കറ്റിന് ആവശ്യക്കാര്‍ ഉയര്‍ന്നതോടെ, കൂടുതല്‍ മത്സരങ്ങളും സൗകര്യങ്ങളും ഉള്‍പ്പെടുത്തിയ പാക്കേജ് വിവിധ രാജ്യങ്ങളില്‍നിന്നുള്ള ആരാധകര്‍ക്ക് ഫലപ്രദമാവും.
പ്രിവിലേജ് കാര്‍ഡ് അംഗങ്ങള്‍ക്കാണ് ഫാന്‍ പാക്കേജ് സ്വന്തമാക്കാന്‍ അവസരമുള്ളത്. ലോകകപ്പിന്‍റെ ഔദ്യോഗിക എയര്‍ലൈന്‍സ് കൂടിയാണ് ഖത്തര്‍ എയര്‍വേസ്. വിവിധ രാജ്യങ്ങളിലായി 150 സ്ഥലങ്ങളിലേക്ക് സര്‍വിസ് നടത്തുന്നതിനാല്‍, ഏത് കോണില്‍നിന്ന് ഖത്തറിലെത്താനും കഴിയും.
