കോഴിക്കോട്: അന്തരിച്ച കോണ്ഗ്രസ് നേതാവ് എം.ഐ. ഷാനവാസിന്റെ മകള് അമീനയെ തെരഞ്ഞെടുപ്പില് മത്സരിപ്പിക്കാനുള്ള നീക്കത്തില് എതിര്പ്പുമായി കെഎസ്യു രംഗത്ത്. തിരുത്തല് വാദത്തിന് നേതൃത്വംകൊടുത്ത ഷാനവാസിന്റെ മകള് കോണ്ഗ്രസ് പാര്ട്ടിയുടെ നേതൃത്വത്തിലേക്ക് വരുന്നതിനെ സ്വാഗതം ചെയ്യുന്നെങ്കിലും, പ്രവര്ത്തകരുടെ വികാരം ഉള്കൊള്ളാതെ ഒരു സ്ഥാനാര്ത്ഥിയെ മത്സരിപ്പിക്കാന് പാടില്ലെന്ന് കൃത്യമായി പാര്ട്ടി നേതൃത്വത്തെ അറിയിക്കുമെന്ന് അഭിജിത്ത് ഫേസ്ബുക്ക് പോസ്റ്റില് പറഞ്ഞു.
കഴിഞ്ഞ ദിവസം കൊച്ചിയിലെത്തിയ കോണ്ഗ്രസ് അധ്യക്ഷന് രാഹുല് ഗാന്ധി ഷാനവാസിന്റെ വീട് സന്ദര്ശിച്ചിരുന്നു. പാര്ട്ടി നിര്ദേശിച്ചാല് മത്സരിക്കാന് തയാറാണെന്ന് ഷാനവാസിന്റെ മകള് പ്രതികരിക്കുകയും ചെയ്തിരുന്നു.
കെ.എം. അഭിജിത്തിന്റെ ഫേസ്ബുക്ക് പോസ്റ്റ്…
കേരളത്തിലെ കോണ്ഗ്രസ് രാഷ്ട്രീയത്തില് ഒഴിച്ചുകൂടാന് കഴിയാത്ത വ്യക്തിത്വമായിരുന്നു ബഹു. എം.ഐ ഷാനവാസ്. കോണ്ഗ്രസ് പാര്ട്ടിയുടെ നേതൃത്വ പദവികള് വഹിച്ചുകൊണ്ട് പ്രതിസന്ധിയില് പാര്ട്ടിയെ കെട്ടിപ്പടുക്കാന് നേതൃത്വം കൊടുത്ത നേതാവ് കൂടിയാണ് അദ്ദേഹം. ഒരുപക്ഷേ കേരളത്തിലെ കോണ്ഗ്രസ് ചരിത്രത്തില് തിരുത്തല്വാദ രാഷ്ട്രീയത്തില് നിര്ണായക പങ്കുവഹിച്ച വ്യക്തിയാണ് എം.ഐ.
എം.ഐ ഷാനവാസിന്റെ വിയോഗം കോണ്ഗ്രസ് പാര്ട്ടിക്ക്, വിശിഷ്യാ മലബാറിലെ കോണ്ഗ്രസ് പാര്ട്ടിക്കും ജനങ്ങള്ക്കും വലിയ പ്രയാസമാണ് സൃഷ്ടിച്ചത്. മറ്റൊരു പാര്ലമെന്റ് തെരഞ്ഞെടുപ്പുകാലത്ത് എം.ഐ ഷാനവാസിന്റ വിയോഗം പാര്ട്ടിക്കും സമൂഹത്തിനും എത്രമാത്രം നഷ്ടമാണുണ്ടാക്കിയതെന്ന് തിരിച്ചറിയപ്പെടുകയാണ്. കെഎസ്യുവിന് യൂത്ത് കോണ്ഗ്രസിന്, കോണ്ഗ്രസിന് പ്രതിസന്ധികളില് കൈത്താങ്ങായ എംഐക്ക് പകരം മറ്റൊരു പകരക്കാരനെ പാര്ട്ടി നേതൃത്വം കണ്ടെത്തും എന്ന കാര്യത്തില് തര്ക്കമില്ല.
പക്ഷേ അറിഞ്ഞോ അറിയാതെയോ വയനാട് പാര്ലമെന്റ് സീറ്റില് അദ്ദേഹത്തിന്റെ മകളുടെ പേര് വരെ ചര്ച്ച ചെയ്യപ്പെടുന്നത് കണ്ടു. തിരുത്തല് വാദത്തിന് നേതൃത്വംകൊടുത്ത എം.ഐ ഷാനവാസിന്റെ മകള് കോണ്ഗ്രസ് പാര്ട്ടിയുടെ നേതൃത്വത്തിലേക്ക് വരുന്നതിനെ ഇരു കൈകള് നീട്ടി സ്വാഗതം ചെയ്യുന്നു. പക്ഷേ വരാനിരിക്കുന്ന പാര്ലമെന്റ് തെരഞ്ഞെടുപ്പില് വയനാട് പോലെ 100% വിജയസാധ്യതയുള്ള മണ്ഡലത്തില് പാര്ട്ടിപ്രവര്ത്തകരുടെ, ജനങ്ങളുടെ വികാരം ഉള്കൊള്ളാതെ ഒരു സ്ഥാനാര്ത്ഥിയെ മത്സരിപ്പിക്കാന് പാടില്ലെന്ന് കൃത്യമായി പാര്ട്ടി നേതൃത്വത്തെ അറിയിക്കും.
വ്യക്തി ജീവിതത്തില്നിന്ന് പാര്ട്ടിയെ കെട്ടിപ്പടുക്കാന് വേണ്ടി എംഐയുടെ മകള് കടന്നു വരുന്പോള് പരിപൂര്ണ പിന്തുണയുമായി അവര്ക്കൊപ്പം ഞാനുള്പ്പെടെയുള്ള കെഎസ്യു പ്രവര്ത്തകര് ഉണ്ടാകും. അതുകൊണ്ട് പാര്ട്ടിയില് പ്രവര്ത്തിക്കാന് അവര് തയാറായാല് കൃത്യമായ പാര്ട്ടി നേതൃസ്ഥാനത്തേക്ക് കൊണ്ടുവന്നു അവരുടെ കഴിവുകളെ പ്രകടിപ്പിക്കാനുള്ള അവസരം കോണ്ഗ്രസ് പാര്ട്ടി ഒരുക്കണമെന്നും പാര്ട്ടി നേതാക്കളെ അറിയിക്കും.
ബഹുമാനപ്പെട്ട എഐസിസി പ്രസിഡന്റ് രാഹുല് ഗാന്ധി സൂചിപ്പിച്ച പോലെ പാര്ട്ടിയുടെ മുന്നോട്ടുള്ള പ്രയാണത്തില് നട്ടെല്ലായ ബൂത്ത് തല പ്രവര്ത്തകരുടെ കൂടി വികാരം ഉള്ക്കൊണ്ട് വയനാടിന്റെ കാര്യത്തില് പാര്ട്ടി കൃത്യമായ നടപടി സ്വീകരിക്കണമെന്നും ആവശ്യപ്പെടും.