ശബരിമലയില് യുവതീ പ്രവേശനം വഴി ആചാരം ലംഘിക്കപ്പെട്ടുവെന്നാരോപിച്ച് ശബരിമല കര്മസമിതി പ്രഖ്യാപിച്ച ഹര്ത്താലില് സംസ്ഥാനത്തിന്റെ പല ഭാഗങ്ങളിലും അക്രമം. ഹര്ത്താല് അനുകൂലികള് സംസ്ഥാനത്തിന്റെ പലയിടങ്ങളിലും ഗതാഗതം തടസപ്പെടുത്തി. പത്തനാപുരത്തും കൊട്ടരക്കരയിലും ഗതാഗതം പൂര്ണായി തടസപ്പെട്ടു. റോഡില് തടികള് കൂട്ടിയിടുകയും ടയറുകള് കത്തിച്ചുമാണ് ഗതാഗതം തടസപ്പെടുത്തിയത്. വാഹനങ്ങള് തടഞ്ഞത് പലയിടങ്ങളിലും ശബരിമല തീര്ഥാടകരെയും ബാധിച്ചിട്ടുണ്ട്. കണ്ണൂര്, പയ്യന്നൂര്, എടാട്ട്, പെരുന്പ, നിലയ്ക്കല് എന്നിവിടങ്ങളില് കെഎസ്ആര്ടിസി ബസിനുനേരെ കല്ലേറുണ്ടായി. കല്ലേറില് കെഎസ്ആര്ടിസി ബസുകളുടെ ചില്ല് തകര്ന്നിട്ടുണ്ട്. എരുമേലിയില് തുറന്ന കടകള് ശബരിമല കര്മസമിതി അംഗങ്ങള് എത്തി ബലമായി അടപ്പിച്ചു. സിപിഎം ലോക്കല് കമ്മിറ്റി ഓഫീസിന് തീയിട്ടു മലപ്പുറം: തവനൂരില് സിപിഎം ലോക്കല് കമ്മിറ്റി ഓഫീസിന് തീയിട്ടു.
വ്യാഴാഴ്ച പുലര്ച്ചെയാണ് അജ്ഞാത സംഘം ഓഫീസിന് തീയിട്ടത്. ഓഫീസിലെ ഫര്ണിച്ചറുകളും ജനലുകളും കത്തിനശിച്ചു. ശബരിമലയില് യുവതികള് കയറിയതില് പ്രതിഷേധിച്ച് സംസ്ഥാന വ്യാപകമായി പ്രതിഷേധം അരങ്ങേറുന്നതിനിടെയാണ് സംഭവം. ഹര്ത്താല് അനുകൂലികളാണ് ഓഫീസിന് തീയിട്ടതെന്ന് സിപിഎം ആരോപിച്ചു.