സൊളന്‍: ഹിമാചലിലെ സൊളന്‍ ജില്ലയില്‍ കെട്ടിടം തകര്‍ന്ന് മരിച്ചവരുടെ എണ്ണം 7 ആയി.മരിച്ചവരിൽ ആറുപേര്‍ സൈനിക ഉദ്യോഗസ്ഥരാണ്.പത്തോളം പേര്‍ കെട്ടിടത്തിനകത്ത് കുടുങ്ങിയിട്ടുണ്ട്. ഇവര്‍ക്കായി രക്ഷാ പ്രവര്‍ത്തനം പുരോഗമിക്കുകയാണ്. അഞ്ച് സൈനികര്‍ ഉള്‍പ്പെടെ 17 പേരെ രക്ഷപ്പെടുത്തിയതായി പൊലീസ് അറിയിച്ചു.
കനത്ത മഴയെ തുടര്‍ന്നാണ് നഹന്‍- കുമര്‍ഹട്ടി റോഡിലെ ഹോട്ടല്‍ പ്രവര്‍ത്തിക്കുന്ന കെട്ടിടം തകര്‍ന്നത്. ഉത്തരഖണ്ഡിലേക്ക് പോവുകയായിരുന്ന സൈനികര്‍ കുടുംബാഗങ്ങളോടൊപ്പം ഉച്ച ഭക്ഷണം കഴിക്കാനാണ് ഹോട്ടലില്‍ എത്തിയത്. രക്ഷാപ്രവര്‍ത്തനത്തിന് സൈനിക സഹായം തേടിയിട്ടുണ്ട്.
