ചെന്നൈ: പ്രശസ്ത സംവിധായകനും തിരക്കഥാകൃത്തും ചലച്ചിത്ര വികസന കോര്പ്പറേഷന് ചെയര്മാനുമായ ലെനിന് രാജേന്ദ്രന് അന്തരിച്ചു. 67 വയസായിരുന്നു. ചെന്നൈയിലെ സ്വകാര്യ ആശുപത്രിയില് വച്ചാണ് മരണം. രണ്ടാഴ്ച മുമ്ബ് കരള് മാറ്റിവയ്ക്കല് ചികിത്സയ്ക്ക വിധേയനായിരുന്നു. ജീവിതത്തിലേക്ക് തിരിച്ചുവരുമെന്ന പ്രതീക്ഷയിലായിരുന്നു കുടുംബം. മരണ സമയത്ത് കുടുംബാഗങ്ങള് അടുത്തുണ്ടായിരുന്നു. ഭാര്യ:ഡോ.രമണി , മക്കള്:പാര്വതി, ഗൗതമന്.
1981ല് വേനല് എന്ന സിനിമയിലൂടെയാണ് ലെനിന് രാജേന്ദ്രന് മലയാള സിനിമാ രംഗത്തേക്ക് കാല്വയ്ക്കുന്നത്. എണ്പതുകളുടെ തുടക്കത്തില് മലയാള സിനിമയിലെ നവസിനിമയുടെ വക്താക്കളിലൊരാളായി ലെനിന് രാജേന്ദ്രന് ശ്രദ്ധേയനായി. വേനല്, ചില്ല്, പ്രേം നസീറിനെ കാണ്മാനില്ല, മീനമാസത്തിലെ സൂര്യന്, മഴക്കാല മേഘം, സ്വാതി തിരുന്നാള്, പുരാവൃത്തം, വചനം, ദൈവത്തിന്റെ വികൃതികള്, കുലം മഴ, അന്യര്, രാത്രിമഴ, മകരമഞ്ഞ് എന്നിവയാണ് സിനിമകള്.
