തിരുവനന്തപുരം: ഞായറാഴ്ചകളില് വകുപ്പുതല പ്രമോഷന് പരീക്ഷകള് നടത്താന് പിഎസ്സി തീരുമാനം. ഈ മാസം 17 മുതല് മേയ് 12 വരെ നീളുന്ന ആറു ഞായറാഴ്ചകളിലായാണു വകുപ്പുതല പ്രമോഷന് പരീക്ഷകള് നടത്തുന്നത്. ഞായറാഴ്ച രാവിലെ ഒന്പതു മുതല് വൈകുന്നേരം അഞ്ചു വരെ മൂന്നു ഷിഫ്റ്റിലാണു പരീക്ഷ.
മാര്ച്ച് 17, 24, ഏപ്രില് ഏഴ്, 28, മേയ് അഞ്ച്, 12 എന്നീ ഞായറാഴ്ചകളിലാണു പരീക്ഷ. ഡിപ്പാര്ട്ട്മെന്റല് പരീക്ഷകള് നേരത്തെ ഒഎംആര് മാതൃകയിലാണ് നടത്തിയിരുന്നത്. ഇപ്പോള് ഓണ്ലൈന് പരീക്ഷയാക്കിയപ്പോള് എന്ജിനിയറിംഗ് കോളജുകളിലേക്കു കൂടി പരീക്ഷാ കേന്ദ്രങ്ങള് വ്യാപിപ്പിച്ചു. എന്ജിനിയറിംഗ് കോളജുകളിലെ കന്പ്യൂട്ടര് സൗകര്യങ്ങള് ഞായറാഴ്ചകളിലേ ലഭ്യമാകൂ എന്നതിനാലാണ് ഈ ദിവസങ്ങളില് പരീക്ഷ നടത്തുന്നത്.
