പത്തനംതിട്ട: ശബരിമല ദര്ശനത്തിനായി എത്തിയ യുവതികളെ പോലീസ് തിരിച്ചയച്ചു. രേഷ്മ നിശാന്ത്, ഷാനില എന്നിവരെയാണ് പോലീസ് നിലയ്ക്കലില്നിന്ന് എരുമേലിയിലേക്കു മടക്കി അയച്ചത്.
നിലയ്ക്കലിലെത്തിയ ഇരുവരേയും പോലീസ് തടഞ്ഞു കണ്ട്രോള് റൂമിലേക്കു മാറ്റിയിരുന്നു. ശബരിമല ദര്ശനത്തിനു സുരക്ഷ നല്കാന് കഴിയില്ലെന്നു പോലീസ് യുവതികളെ അറിയിച്ചു. മല കയറാന് ശ്രമിച്ചാല് വന് പ്രതിഷേധമുണ്ടാകുമെന്നും പോലീസ് മുന്നറിയിപ്പ് നല്കി. ഇതിനുശേഷമാണ് തിരിച്ചയയ്ക്കാന് തീരുമാനിച്ചത്. സംഘര്ഷാവസ്ഥ കണക്കിലെടുത്ത് സ്ഥലത്ത് കൂടുതല് പോലീസിനെ വിന്യസിച്ചിട്ടുണ്ട്.
ബുധനാഴ്ച ദര്ശനത്തിനെത്തിയ ഇവരെ പ്രതിഷേധക്കാര് നീലിമലയില് തടഞ്ഞിരുന്നു. വ്രതം എടുത്താണ് ദര്ശനത്തിനായി എത്തിയതെന്നും പിന്മാറാന് തയാറല്ലെന്നും ഇവര് പോലീസിനെ അറിയിച്ചു. എന്നാല് മുന്നോട്ടു പോകാന് അനുവദിക്കില്ലെന്നു പ്രതിഷേധക്കാര് നിലപാടെടുത്തു. ഇതോടെ പോലീസ് ഇടപെട്ട് ഇവരെ മടക്കി അയയ്ക്കുകയായിരുന്നു.
മണ്ഡലകാലത്ത് 41 ദിവസത്തെ വ്രതമെടുത്ത് ശബരിമല കയറുമെന്ന് ഫേസ്ബുക്കില് കുറിച്ച രേഷ്മയ്ക്കുനേരേ ഭീഷണി ഉയര്ന്ന സാഹചര്യവുമുണ്ടായി. ഇതേതുടര്ന്ന് ജില്ലാ പോലീസ് മേധാവിക്ക് ഇവര് പരാതി നല്കുകയും രേഷ്മയുടെ വീട്ടുപരിസരത്ത് പോലീസ് സുരക്ഷ ഏര്പ്പെടുത്തുകയും ചെയ്തു.