ബംഗളൂരു: ബിജെപിക്കാര്‍ റാഞ്ചുമെന്നു ഭയന്ന് ബംഗളൂരുവിലെ റിസോര്‍ട്ടില്‍ ഒളിപ്പിച്ച കോണ്‍ഗ്രസ് എംഎല്‍എമാര്‍ ഇന്ന് വീണ്ടും യോഗം ചേരും. മുന്‍ മുഖ്യമന്ത്രി സിദ്ധരാമയ്യയാണ് യോഗം വിളിച്ചിരിക്കുന്നത്. രാവിലെ 11നാണ് യോഗം.
കഴിഞ്ഞ ദിവസം റിസോര്‍ട്ടില്‍ താമസിപ്പിച്ചിരുന്ന എംഎല്‍എമാര്‍ തമ്മില്‍ വാക്കേറ്റവും സംഘര്‍ഷവുമുണ്ടായിരുന്നു. സംഭവത്തില്‍ ഒരു എംഎല്‍എയ്ക്ക് പരിക്കേല്‍ക്കുകയും ചെയ്തിരുന്നു. വിഷയം പുറംലോകം അറിഞ്ഞതോടെ ഉപമുഖ്യമന്ത്രി ഡോ.ജി. പരമേശ്വര റിസോര്‍ട്ടിലെത്തി കാര്യങ്ങള്‍ തിരക്കിയിരുന്നു. എംഎല്‍എമാരുടെ താമസസൗകര്യം ഒരുക്കിയ ഡി.കെ. ശിവകുമാറും സ്ഥലത്തെത്തിയിരുന്നു.
ഇതിനു പിന്നാലെയാണ് സിദ്ധരാമയ്യ ഇന്ന് യോഗം വിളിച്ചിരിക്കുന്നത്. കഴിഞ്ഞ തവണ ചേര്‍‌ന്ന യോഗത്തില്‍ നിന്ന് നാല് എംഎല്‍എമാര്‍ വിട്ടുനിന്നിരുന്നു. ഇതില്‍ രണ്ട് എംഎല്‍എമാര്‍ അസാന്നിധ്യത്തിനുള്ള കാരണം പാര്‍ട്ടി നേതൃത്വത്തെ അറിയിച്ചിരുന്നു.
മറ്റ് രണ്ട് എംഎല്‍എമാര്‍ക്കെതിരെയും കൂറുമാറ്റ നിരോധന നിയമപ്രകാരം നടപടിക്കാവശ്യപ്പെടുമെന്ന് പാര്‍ട്ടി നേതൃത്വം വ്യക്തമാക്കിയിരുന്നു. ഇതിന് മുന്നോടിയായി രണ്ട് എംഎല്‍എമാരോടും വിശദീകരണവും തേടിയിരുന്നു.
