കോട്ടയത്ത് കോവിഡ് ബാധിച്ച് മരിച്ചയാളുടെ സംസ്കാരം തടഞ്ഞ സംഭവത്തില് കര്ശന നടപടിയെന്ന് മുഖ്യമന്ത്രി പിണറായി വിജയന്. മരിച്ചവരോടുള്ള അനാദരവ് നമ്മുടെ സംസ്കാരത്തിന് നിരക്കാത്തതാണെന്നും അദ്ദേഹം പറഞ്ഞു.
മൃതദേഹത്തില്നിന്ന് രോഗം പകരാനുള്ള സാധ്യത കുറവാണ്. കേന്ദ്രസര്ക്കാര് ഇതിന് കോവിഡ് പ്രോട്ടോക്കോള് പുറത്തിറക്കിയിട്ടുണ്ട്. ഇതുപ്രകാരമാണ് ആരോഗ്യപ്രവര്ത്തകര് ഇത്തരം സാഹചര്യങ്ങളെ നേരിടുന്നതെന്നും അദ്ദേഹം പറഞ്ഞു.
സംസ്കാരം തടയാന് കൂട്ടം കൂടുന്നതാണ് അപകടകരം. സംസ്കാരം തടയാന് ജനപ്രതിനിധി കൂടി ഉണ്ടായത് അപമാനകരമാണെന്നും അദ്ദേഹം പറഞ്ഞു. കേസില് ശക്തമായ നടപടിയെടുക്കാന് പോലീസിന് നിര്ദേശം നല്കിയെന്നും മുഖ്യമന്ത്രി കൂട്ടിച്ചേര്ത്തു.
കോവിഡ് ബാധിച്ച് മരിച്ചയാളുടെ മൃതദേഹം കോട്ടയം നഗരസഭയിലെ മുട്ടന്പലം വൈദ്യുതി ശ്മാശനത്തില് സംസ്കരിക്കാനുള്ള അധികൃതരുടെ നീക്കത്തിനെതിരെയാണ് പ്രദേശവാസികള് പ്രതിഷേധവുമായി രംഗത്തെത്തിയത്.
തിരുവഞ്ചൂര് രാധാകൃഷ്ണന് എംഎല്എയുടെ സാന്നിധ്യത്തില് പ്രതിഷേധക്കാരുമായി നടത്തിയ ചര്ച്ചയെത്തുടര്ന്ന് മൃതദേഹം മറ്റൊരിടത്ത് സംസ്കരിക്കാന് ജില്ലാ ഭരണകൂടം തീരുമാനിച്ചു. പിന്നീട് വന് പോലീസ് സന്നാഹത്തോടെ ഞായറാഴ്ച രാത്രി 11ന് മുട്ടന്പലത്തുതന്നെ സംസ്കരിച്ചു.