ജയ്പുര്‍/ലക്നോ: മായവതിക്ക് തിരിച്ചടി. രാജസ്ഥാനിലെ ആറ് ബിഎസ്പി എംഎല്‍എമാരും കോണ്‍ഗ്രസില്‍ ചേര്‍ന്നു. ഇതോടെ രാജസ്ഥാന്‍ നിയമസഭയില്‍ കോണ്ഗ്രസിന്റെ അംഗസംഖ്യ 106 ആയി ഉയര്‍ന്നു. ഒരു ആര്‍എല്‍ഡി അംഗവും 12 സ്വതന്ത്രരും സര്‍ക്കാരിനെ പിന്തുണയ്ക്കുന്നു. രണ്ടു നിയമസഭാ മണ്ഡലങ്ങളിലേക്ക് ഉപതെരഞ്ഞെടുപ്പു നടക്കാനിരിക്കേയാണ് ആറ് ബിഎസ്പി എംഎല്‍എമാര്‍ കോണ്‍ഗ്രസിലെത്തിയത്.
രാജേന്ദ്ര സിംഗ് ഗുഥ, ജോഗേന്ദ്ര സിംഗ് അവാന, വജീബ് അലി, ലഖന്‍ സിംഗ് മീണ, സന്ദീപ് യാദവ്, ദീപ്ചന്ദ് എന്നിവരാണു കോണ്‍ഗ്രസില്‍ ചേര്‍ന്നത്. ഇവര്‍ തിങ്കളാഴ്ച രാത്രി സ്പീക്കര്‍ സി.പി. ജോഷിയെ സന്ദര്‍ശിച്ച്‌ കോണ്‍ഗ്രസില്‍ ചേരാനുള്ള തീരുമാനം അറിയിക്കുകയായിരുന്നു. കോണ്ഗ്രസിന്റെ നടപടി വഞ്ചനയാണെന്ന് ബിഎസ്പി അധ്യക്ഷ മായാവതി കുറ്റപ്പെടുത്തി. കോണ്‍ഗ്രസ് വിശ്വസിക്കാന്‍ കൊള്ളാത്ത പാര്‍ട്ടിയാണെന്ന് ഒരിക്കല്‍ കൂടി തെളിയിച്ചുവെന്ന് മായാവതി പറഞ്ഞു.
‘എതിരാളികള്‍ക്കെതിരെ ശക്തമായി പോരാടുന്നതിന് പകരം പിന്തുണയ്ക്കുന്ന പാര്‍ട്ടികളെ ദ്രോഹിക്കുന്നതാണ് കോണ്ഗ്രസിന്റെ നടപടി. എല്ലായ്‌പ്പോഴും ബി.ആര്‍. അംബേദ്കറിനെതിരെയും അദ്ദേഹത്തിന്റെ പ്രത്യയശാസ്ത്രത്തിനെതിരെയും നിലകൊണ്ട പാര്‍ട്ടിയാണ് കോണ്‍ഗ്രസ്. അതുകൊണ്ടാണ് അംബേദ്കര്‍ നിയമമന്ത്രിസ്ഥാനം രാജിവെച്ചത്. കോണ്‍ഗ്രസ് ഒരിക്കലും ഭാരതരത്ന നല്‍കി അദ്ദേഹത്തെ ആദരിച്ചിട്ടില്ലെന്നത് ദു:ഖകരവും അപമാനകരവുമാണ്’ മായാവതി പറഞ്ഞു.
