ന്യൂഡല്‍ഹി: ഭീകരപ്രവര്‍ത്തനങ്ങള്‍ക്കുള്ള ധനസമാഹരണവുമായി ബന്ധപ്പെട്ട കേസില്‍ അറസ്റ്റിലായ കാഷ്മീര്‍ വ്യവസായി സഹൂര്‍ അഹമ്മദ് ഷാ വട്ടാലിക്കു ജാമ്യം. ഡല്‍ഹി ഹൈക്കോടതിയാണ് ജാമ്യം അനുവദിച്ചത്. ജസ്റ്റീസുമാരായ മുരളീധര്‍, വിനോദ് ഗോയല്‍ എന്നിവരടങ്ങിയ ബെഞ്ചാണ് ജാമ്യം അനുവദിച്ചത്.
ഉപാധികളോടെയാണ് വട്ടാലിക്കു ജാമ്യം അനുവദിച്ചിരിക്കുന്നത്. രണ്ട് ലക്ഷം രൂപയുടെ ബോണ്ടിന്‍മേലാണ് ജാമ്യം. കഴിഞ്ഞ ജൂണ്‍ എട്ടിന് വിചാരണ കോടതി വട്ടാലിയുടെ ജാമ്യ ഹര്‍ജി തള്ളിയിരുന്നു.
കഴിഞ്ഞ വര്‍ഷം ഓഗസ്റ്റ് 17നാണ് വട്ടാലിയെ എന്‍ഐഎ അറസ്റ്റു ചെയ്തത്. ജനുവരി 18 വട്ടാലിക്കും ലഷ്കറെ തലവന്‍ ഹാഫിസ് സയീദ്, ഹിസ്ബുള്‍ മുജാഹുദീന്‍ തലവന്‍ സയ്ദ് സലാഹുദീന്‍ അടക്കമുള്ള 12 പേര്‍ക്കെതിരെ എന്‍ഐഎ കുറ്റപത്രം സമര്‍പ്പിച്ചത്.
