മുംബൈ: മഹാരാഷ്ട്രയില്‍ സര്‍ക്കാര്‍ രൂപീകരണവുമായി ബന്ധപ്പെട്ട അനിശ്ചിതത്വങ്ങള്‍ നിലനില്‍ക്കുന്നതിനിടെ ബി.ജെ.പിക്കെതിരെ ശക്തമായ വിമര്‍ശനവുമായി ശിവസേന. സംസ്ഥാനത്ത് രാഷ്ട്രപതിഭരണം ഏര്‍പ്പെടുത്തുമെന്ന ധനകാര്യമന്ത്രിയുടെ പ്രസ്താവന ഭരണഘടനാ വിരുദ്ധവും ജനാധിപത്യത്തിന് എതിരാണെന്നും ശിവസേന കുറ്റപ്പെടുത്തി.
മുഖപത്രമായ സാമ്നയില്‍ എഴുതിയ ലേഖനത്തിലും കടുത്ത വിമര്‍ശനങ്ങളാണ് ശിവസേന ബി.ജെ.പിക്കെതിരെ ഉന്നയിക്കുന്നത്. മുഗളന്‍മാരെ പോലെയാണ് ബി.ജെ.പി ഭീഷണിപ്പെടുത്തുന്നതെന്ന് സാമ്നയിലെ ലേഖനത്തില്‍ പറയുന്നു. നിയമവും ഭരണഘടനയും ആരുടെയും അടിമയല്ല. മഹാരാഷ്ട്രയിലെ നിലവിലെ സ്ഥിതിക്ക് ശിവസേന ഉത്തരവാദികളല്ല. അത് ജനങ്ങള്‍ക്ക് അറിയാമെന്നും സാമ്നയിലെ ലേഖനത്തില്‍ ശിവസേന ചൂണ്ടിക്കാട്ടുന്നു.
തെരഞ്ഞെടുപ്പില്‍ ഭൂരിപക്ഷം ലഭിക്കാത്ത ചിലരാണ് രാഷ്ട്രപതി ഭരണം വേണമെന്ന് ആവശ്യപ്പെടുന്നതെന്നും ശിവസേന ആരോപിച്ചു. മഹാരാഷ്ട്രയില്‍ നവംബര്‍ എട്ടിനകം സര്‍ക്കാറുണ്ടാക്കിയില്ലെങ്കില്‍ രാഷ്ട്രപതിഭരണം ഏര്‍പ്പെടുത്തുമെന്ന് ബി.ജെ.പി മന്ത്രി ഭീഷണി മുഴക്കിയിരുന്നു. ഇതിന് പിന്നാലെയാണ് ശിവസേനയുടെ വിമര്‍ശനം.
