കോട്ടയം: കന്യാസ്ത്രീയെ പീഡിപ്പിച്ച കേസില് പാലാ സബ് ജയിലില് റിമാന്ഡില് കഴിയുന്ന ബിഷപ്പ് ഫ്രാങ്കോ മുളയ്ക്കല് ഹൈക്കോടതിയില് വീണ്ടും ജാമ്യാപേക്ഷ നല്കി. ജാമ്യാപേക്ഷ ഹൈക്കോടതി ഇന്ന് പരിഗണിക്കും.
അന്വേഷണം ഇതിനകം പൂര്ത്തിയായിട്ടുള്ളതിനാല് ജാമ്യം അനുവദിക്കണമെന്നാണ് ആവശ്യം. അന്വേഷണത്തോടു താന് പൂര്ണമായും സഹകരിച്ചിട്ടുണ്ടെന്നും ഹര്ജിയില് ബിഷപ്പ് വാദിക്കുന്നു. പാലാ ഒന്നാം ക്ലാസ് ജുഡീഷ്യല് മജിസ്ട്രേറ്റ് കോടതി അദ്ദേഹത്തിന്റെ റിമാന്ഡ് കാലാവധി ഒക്ടോബര് 20 വരെ നീട്ടിയിരുന്നു. ജാമ്യം നല്കണമെന്നാവശ്യപ്പെട്ട നേരത്തേ ബിഷപ്പ് ഹൈക്കോടതിയെ സമീപിച്ചപ്പോള് അതു നിരസിക്കുകയാണുണ്ടായത്. ബിഷപ്പിനെതിരെ പ്രഥമദൃഷ്ട്യാ തെളിവുണ്ടെന്നു നിരീക്ഷിച്ച കോടതി ജാമ്യാപേക്ഷ തള്ളുകയായിരുന്നു.
കേസ് അന്വേഷണം പ്രാരംഭഘട്ടത്തിലാണ്. ഉന്നത നിലയിലുള്ള പ്രതി സാക്ഷികളെ സ്വാധീനിക്കാന് സാധ്യതയുണ്ടെന്നും അന്നു പ്രോസിക്യൂഷന് വാദിച്ചിരുന്നു. മജിസ്ട്രേറ്റിനു മുന്നില് കന്യാസ്ത്രീ കൊടുത്ത രഹസ്യമൊഴിയില് ബിഷപ്പിനെതിരായ തെളിവുണ്ടെന്നു നിലപാടു വ്യക്തമാക്കിയാണ് അന്നു കോടതി ജാമ്യാപേക്ഷ തള്ളിയത്.
