ന്യൂഡല്ഹി: 12 വയസിനു താഴെയുള്ള കുട്ടികള്ക്കെതിരേയുള്ള പീഡനക്കേസുകളില് പ്രതിക്കു വധശിക്ഷ നല്കുന്നതിനുള്ള ഓര്ഡിനന്സിനു കേന്ദ്ര മന്ത്രിസഭ അംഗീകാരം നല്കി. കഠുവ, ഉന്നാവോ മാനഭംഗക്കേസുകളുടെ പശ്ചാത്തലത്തിലാണു കുട്ടികള്ക്കെതിരേയുള്ള ലൈംഗികാതിക്രമം തടയല് നിയമമായ പോക്സോയില് ഭേദഗതി വരുത്താന് കേന്ദ്രസര്ക്കാര് തീരുമാനമെടുത്തത്.
12 വയസു വരെയുള്ള കുട്ടികളെ മാനഭംഗത്തിനിരയാക്കുന്നവര്ക്കു വധശിക്ഷ ലഭിക്കുന്ന വിധമാകും മാറ്റം. നിലവിലെ നിയമപ്രകാരം പരമാവധി ജീവപര്യന്തവും കുറഞ്ഞത് ഏഴു വര്ഷം തടവുമാണ് ശിക്ഷ. കുട്ടികള്ക്കെതിരേ ലൈംഗികാതിക്രമം നടത്തുന്നവര്ക്കു മരണശിക്ഷ നല്കുന്ന രീതിയില് നിയമം ഭേദഗതി ചെയ്യാന് ഉദ്ദേശിക്കുന്നതായി കേന്ദ്രസര്ക്കാര് കഴിഞ്ഞ ദിവസം സുപ്രീംകോടതിയെ അറിയിച്ചിരുന്നു.
മാനഭംഗത്തിനിരയായ വ്യക്തി മരണപ്പെടുകയോ ജീവച്ഛവമാകുകയോ ചെയ്താല് പ്രതിക്കു വധശിക്ഷ നല്കണമെന്ന ഓര്ഡിനന്സ് 2012 ഡിസംബറിലെ നിര്ഭയ കേസിനു ശേഷം കേന്ദ്രസര്ക്കാര് പുറപ്പെടുവിച്ചിരുന്നു. ഈ ഓര്ഡിനന്സ് ക്രിമിനല് നിയമ ഭേദഗതി എന്ന പേരില് നിയമമാകുകയും ചെയ്തു.