മലയാള സിനിമാമേഖലയിലെ തൊഴിലാളി സംഘടനയായ ഫെഫ്കയുടെ കൊവിഡ് സാന്ത്വന പദ്ധതിയിലേക്ക് സംഭാവന നല്കി പൃഥ്വിരാജ്. മൂന്ന് ലക്ഷം രൂപയാണ് പൃഥ്വി നല്കിയത്. ഫെഫ്ക ജനറല് സെക്രട്ടറി ബി ഉണ്ണികൃഷ്ണന് സംഘടനയുടെ നന്ദി അറിയിച്ചു.
ഫെഫ്കയ്ക്കു കീഴിലുള്ള 19 യൂണിയനുകളില് അംഗങ്ങളായ മലയാള ചലച്ചിത്ര പ്രവര്ത്തകര്ക്കായി ബൃഹത്തായ സഹായ പദ്ധതികള് സംഘടന കഴിഞ്ഞ ദിവസം പ്രഖ്യാപിച്ചിരുന്നു.
ആശുപത്രിയില് അഡ്മിറ്റ് ആയ കൊവിഡ് ബാധിതര്ക്ക് ധനസഹായം, കൊവിഡ് മെഡിക്കല് കിറ്റ്, അംഗങ്ങള്ക്കും കുടുംബാംഗങ്ങള്ക്കും ജീവന്രക്ഷാ മരുന്നുകളുടെ സൗജന്യ വിതരണം, കുട്ടികളുടെ പഠന സാമഗ്രികള് വാങ്ങാനുള്ള സഹായം, കൊവിഡ് മൂലം മരണമടയുന്ന അംഗങ്ങളുടെ കുടുംബത്തിന് അമ്ബതിനായിരം രൂപ, ആവശ്യമെങ്കില് ആശ്രിതര്ക്ക് സംഘടനാ അംഗത്വം, ജോലി എന്നിവ അടങ്ങുന്നതാണ് ഫെഫ്കയുടെ കൊവിഡ് സാന്ത്വന പദ്ധതി.