കാഞ്ഞങ്ങാട്: ജില്ലയിലെ സര്‍ക്കാര്‍ സ്ഥാപനങ്ങളിലും പൊതു ഇടങ്ങളിലും അണുനശീകരണം നടത്തുന്നതിനായി 20 ലക്ഷം രൂപ വിലവരുന്ന 3,520 ലിറ്റര്‍ സോഡിയം ഹൈപ്പോ ക്ലോറേറ്റ് ലായനി മുബൈ ആസ്ഥാനമായി പ്രവര്‍ത്തിക്കുന്ന ഗാര്‍ദ്ധ കെമിക്കല്‍സ് ജനറല്‍ മാനേജര്‍ തലശേരി കതിരൂര്‍ സ്വദേശിയായ സതീഷ് നമ്ബ്യാര്‍ ജില്ലാ മെഡിക്കല്‍ ഓഫീസര്‍ ഡോ. എ.വി. രാംദാസിന് കൈമാറി. ഗുജറാത്തില്‍ നിന്ന് പ്രത്യേകം സജ്ജീകരിച്ച രണ്ടു ലോറികളിലായി 176 കാനുകളിലായാണ് ലായനി എത്തിച്ചത്. ഇതിനുപുറമെ 1,000 പിപിഇ കിറ്റുകളും സംഭാവനയായി നല്‍കും. സോഡിയം ഹൈപ്പോ ക്ലോറേറ്റ് ലായനിയുടെ ലഭ്യതക്കുറവും ഉയര്‍ന്ന വിലയും കാരണം ജില്ലയില്‍ ബ്ലീച്ചിംഗ് സൊല്യൂഷന്‍ ഉപയോഗിച്ചാണ് ഈ ശുചീകരണ പ്രവര്‍ത്തനം നടത്തി വന്നിരുന്നത്. ഇപ്പോള്‍ ലഭിച്ച 3,520 ലിറ്റര്‍ ലായനി 10 ഇരട്ടിയായി നേര്‍പ്പിച്ച്‌ ഉപയോഗിക്കുന്നതിലൂടെ ജില്ലയിലെ മുഴുവന്‍ പഞ്ചായത്തുകളിലും വിതരണം ചെയ്യാനാകും. ഹോട്ട് സ്പോട്ടുകളായ പഞ്ചായത്തുകളിലും നഗരസഭകളിലും വരും ദിവസങ്ങളില്‍ തന്നെ ഈ ലായനി ഉപയോഗിച്ചുകൊണ്ടുള്ള ശുചീകരണ പ്രവര്‍ത്തനങ്ങള്‍ ആരംഭിക്കുമെന്ന് ഡിഎംഒ അറിയിച്ചു.
