മധ്യപ്രദേശില് പീഡനത്തിനിരയായ പതിനെട്ടുകാരി ജീവനൊടുക്കി. ബേതുള് ജില്ലയിലെ ബോതിയയിലാണ് ദാരുണസംഭവം. ചൊവ്വാഴ്ച രാത്രി ആദിവാസി വിഭാഗത്തില്പ്പെട്ട പെണ്കുട്ടിയെ രണ്ടുപേര് ചേര്ന്നു തട്ടിക്കൊണ്ടുപോയി ലൈംഗികമായി പീഡിപ്പിച്ചു. അടുത്ത ദിവസംരാവിലെ വീട്ടില് മടങ്ങിയെത്തിയ പെണ്കുട്ടി വിഷം കഴിച്ചു ജീവനൊടുക്കുകയായിരുന്നു.
അടുത്ത ഗ്രാമത്തില് താമസിക്കുന്ന രണ്ടു യുവാക്കളാണ് പെണ്കുട്ടിയെ തട്ടിക്കൊണ്ടുപോയതെന്നും ഒരാള് പെണ്കുട്ടിയെ മാനഭംഗപ്പെടുത്തിയപ്പോള് ഒപ്പമുണ്ടായിരുന്നയാള് ഇത് മൊബൈല് ഫോണില് പകര്ത്തിയെന്നും കേസ് അനേഷിക്കുന്ന ഝല്ലാര് പോലീസ് സ്റ്റേഷന് ഇന് ചാര്ജ് നേപ്പാള് സിംഗ് താക്കുര് അറിയിച്ചു. പീഡനം സംബന്ധിച്ചു പരാതിപ്പെട്ടാല് വീഡിയോ ദൃശ്യങ്ങള് പുറത്തുവിടുമെന്നും പ്രതികള് ഭീഷണിപ്പെടുത്തി.
പീഡനംനേരിട്ട് അടുത്ത ദിവസം രാവിലെ വീട്ടിലെത്തിയ പെണ്കുട്ടി സംഭവം അമ്മയോടു വിവരിച്ചിരുന്നു. ഇതിനുശേഷമാണ് ഇര ജീവനൊടുക്കിയത്. പെണ്കുട്ടിയുടെ വിവാഹം അടുത്തിടെ ഉറപ്പിച്ചിരുന്നു. വിവാഹം കഴിക്കാനിരുന്ന യുവാവിനോട്, പീഡനം നടത്തിയ പ്രവീണ് റാത്തോഡ് താന് പെണ്കുട്ടിയെ പീഡിപ്പിച്ചതായി ഫോണില് വിളിച്ച് അറിയിച്ചെന്നു പെണ്കുട്ടിയുടെ മാതാവ് പോലീസിനു മൊഴി നല്കി. പ്രതികള്ക്കായി പോലീസ് തെരച്ചില് തുടരുകയാണ്.