പിറവം: ഇലഞ്ഞിയില്‍ വന്‍ കള്ളനോട്ട് നിര്‍മാണ സംഘത്തെ പോലീസ് അറസ്റ്റ് ചെയ്തു. ആറംഗ സംഘമാണ് പിടിയിലായിരിക്കുന്നത്. ഇവര്‍ താമസിച്ച വാടകവീട്ടില്‍ നിന്നും കള്ളനോട്ട് നിര്‍മാണ സാമഗ്രികളും ഏഴ് ലക്ഷം രൂപയുടെ വ്യാജ നോട്ടുകളും പോലീസ് പിടിച്ചെടുത്തിട്ടുണ്ട്.
കെട്ടിട നിര്‍മാണ മേഖലയില്‍ പ്രവര്‍ത്തിക്കുന്നവരെന്ന വ്യാജേനെയാണ് സംഘം ഇലഞ്ഞിയില്‍ വാടക വീടെടുത്തിരുന്നത്. സംഘത്തിലെ ഒരാള്‍ പ്രദേശത്തെ ഒരു പച്ചക്കറി കടയില്‍ നല്‍കിയ 500 രൂപ നോട്ട് പരിശോധിച്ച കടക്കാരന് തോന്നിയ സംശയത്തില്‍ നിന്നാണ് വന്‍ റാക്കറ്റ് കുടുങ്ങിയത്. ഇയാള്‍ വിവരം പോലീസില്‍ അറിയിക്കുകയായിരുന്നു.
ഇന്ന് പുലര്‍ച്ചെ അഞ്ച് മുതല്‍ പോലീസും വിവിധ വകുപ്പ് ഉദ്യോഗസ്ഥരും വീട്ടില്‍ റെയ്ഡിന് എത്തുകയായിരുന്നു. റെയ്ഡ് ഇപ്പോഴും തുടരുകയാണ്. മറ്റ് ജില്ലകളിലും കണ്ണികളുള്ള വന്‍ കള്ളനോട്ട് റാക്കറ്റാണ് കുടുങ്ങിയതെന്ന് പോലീസ് സ്ഥിരീകരിക്കുന്നുണ്ട്. അറസ്റ്റിലായവരെ പോലീസ് ചോദ്യം ചെയ്തു വരികയാണ്.
