കത്വ പെണ്കുട്ടിയുടെ നീതിക്കുവേണ്ടി പോരാടുന്ന സാമൂഹ്യ പ്രവര്ത്തകന് താലിബ് ഹുസൈനെ വ്യാജ ലൈംഗീക പീഡന കേസില് അറസ്റ്റ് ചെയ്ത സംഭവത്തിനെതിരെ സമര്പ്പിച്ച ഹര്ജി പരിഗണിക്കാമെന്ന് സുപ്രീം കോടതി. ഹുസൈന്റെ ബന്ധുവാണ് സുപ്രീം കോടതിയില് ഹര്ജി നല്കിയത്. ഹസൈനെ അറസ്റ്റ് ചെയ്തത് നിയമവിരുദ്ധമായാണെന്ന് ഹര്ജിയില് ആരോപിക്കുന്നു.
ചീഫ് ജസ്റ്റീസ് ദീപക് മിശ്ര അധ്യക്ഷനായ ബെഞ്ചാണ് കേസ് പരിഗണിക്കാമെന്ന് അറിയിച്ചത്. ജൂലൈ 31 ന് ആണ് പീഡനകേസ് പോലീസ് ചാര്ജ് ചെയ്തിരിക്കുന്നത്. അകന്നു കഴിയുന്ന ഭാര്യയുടെ പരാതിയില് ഹുസൈനെതിരെ സ്ത്രീധനം വാങ്ങിയെന്ന കേസ് നേരത്തെ പോലീസ് എടുത്തിരുന്നു.
പീഡന കേസില് അറസ്റ്റിലായ ഹുസൈനെ ജമ്മുകാഷമീര് പോലീസ് ക്രൂരമായാണ് മര്ദിച്ചത്. ഇതിനിടെ പോലീസ് കസ്റ്റഡിയില് ജീവനൊടുക്കാന് ശ്രമിച്ചെന്നാരോപിച്ച് മറ്റൊരു കേസു കൂടി പോലീസ് ചാര്ജ് ചെയ്തിട്ടുണ്ട്.