ന്യൂഡല്‍ഹി: കോണ്‍ഗ്രസ് അധ്യക്ഷന് രാഹുല്‍ ഗാന്ധിക്ക് തെരഞ്ഞെടുപ്പ് കമ്മീഷന്‍റെ കാരണം നോട്ടീസ്. ചൗകിദാര്‍ ചോര്‍ ഹേ പരാമര്‍ശത്തിനാണ് നോട്ടീസ്. ബിജെപിയുടെ പരാതിയിലാണ് കമ്മീഷന്‍റെ നടപടി. 24 മണിക്കൂറിനകം മറുപടി നല്‍കണമെന്നാണ് കമ്മീഷന്‍റെ ഉത്തരവ്.
അമേത്തിയില്‍ നാമനിര്‍ദേശ പത്രിക നല്‍കാനെത്തിയ രാഹുല്‍ ഗാന്ധിയുടെ പ്രസ്താവനയാണ് വിവാദത്തിലായത്. ചൗക്കിദാര്‍ ചോറെന്ന് സുപ്രീംകോടതി കണ്ടെത്തിയതെന്നായിരുന്നു രാഹുലിന്‍റെ പ്രസ്താവന. ഇത് തെരഞ്ഞെടുപ്പ് ചട്ടലംഘനമാണെന്നാണ് ബിജെപിയുടെ പരാതി. പ്രസ്താവനയുടെ വീഡിയോ ദൃശ്യങ്ങള്‍ തെരഞ്ഞെടുപ്പ് ഓഫീസര്‍ പരിശോധിച്ചിരുന്നു. ഇതിനുശേഷമാണ് കോണ്‍ഗ്രസ് അധ്യക്ഷന് നോട്ടീസ് അയച്ചത്. രാഹുലിന്‍റെ മറുപടിയുടെ അടിസ്ഥാനത്തിലാണ് തെര. കമ്മീഷന്‍ തുടര്‍നടപടി സ്വീകരിക്കുക.
ചൗക്കിദാര്‍ ചോര്‍ ഹേ പ്രചാരണത്തില്‍ രാഹുല്‍ ഗാന്ധിക്കെതിരെ ബിജെപി സുപ്രീംകോടതിയെ സമീപിച്ചിരുന്നു. അലക്ഷ്യ ഹര്‍ജി ബിജെപി ഫയല്‍ ചെയ്തിട്ടുണ്ട്. ഏപ്രില്‍ 22നാണ് ഹര്‍ജി കോടതി പരിഗണിക്കുന്നത്.
