വാഷിംഗ്ടണ്‍: യുഎസ് വൈസ് പ്രസിഡന്‍റ് സ്ഥാനത്തേക്കു മത്സരിക്കുന്ന ഡെമോക്രാറ്റിക് സ്ഥാനാര്‍ഥി കമല ഹാരിസിന്‍റെ പ്രസ് സെക്രട്ടറിയായി ഇന്ത്യന്‍ വംശജ സബ്രിന സിംഗ് നിയമിക്കപ്പെട്ടു. ഇതാദ്യമായാണ് ഒരു പ്രധാന രാഷ്ട്രീയ പാര്‍ട്ടി വൈസ് പ്രസിഡന്‍റ് സ്ഥാനാര്‍ഥിയുടെ പ്രസ് സെക്രട്ടറിയായി ഒരു ഇന്തോ-അമേരിക്കന്‍ നിയമിക്കപ്പെടുന്നത്.
രണ്ടു ഡെമോക്രാറ്റിക് പ്രസിഡന്‍റ് സ്ഥാനാര്‍ഥികളുടെ വക്താവായിരുന്നു സബ്രിന. ന്യൂജേഴ്സി സെനറ്റര്‍ കോറി ബുക്കര്‍, മുന്‍ ന്യുയോര്‍ക്ക് മേയര്‍ മൈക്ക് ബ്ലൂംബര്‍ഗ് എന്നിവരുടെ വക്താവായാണു സബ്രിന പ്രവര്‍ത്തിച്ചത്. ഇപ്പോള്‍ ലോസ് ആഞ്ചല്‍സില്‍ താമസിക്കുന്ന സബ്രിന, മുന്പ് ഡെമോക്രാറ്റിക് നാഷണല്‍ കമ്മിറ്റി വക്താവായും പ്രവര്‍ത്തിച്ചിട്ടുണ്ട്.
അമേരിക്കയിലെ ഇന്ത്യന്‍ സമൂഹത്തിന്‍റെ ഉന്നമനത്തിനായി പ്രവര്‍ത്തിക്കുന്ന ഇന്ത്യ ലീഗ് ഓഫ് അമേരിക്ക എന്ന സംഘടനയുടെ സ്ഥാപക നേതാക്കളില്‍ ഒരാളായ ജെ.ജെ. സിംഗിന്‍റെ കൊച്ചുമകളാണു സബ്രിന. കഴിഞ്ഞ ആഴ്ചയാണ് ഡെമോക്രാറ്റിക് വൈസ് പ്രസിഡന്‍റ് സ്ഥാനാര്‍ഥിയായി കമല ഹാരിസിനെ പ്രസിഡന്‍ഷ്യല്‍ നോമിനി ജോ ബൈഡന്‍ തെരഞ്ഞെടുത്തത്.
