ഡല്‍ഹി: ഹിന്ദുസമാജ് പാര്‍ട്ടി നേതാവ് കമലേഷ് തിവാരിയെ വെടിവെച്ച്‌ കൊലപ്പെടുത്തിയ സംഭവത്തില്‍ മൂന്നുപേര്‍ അറസ്റ്റിലായി . ഗുജറാത്തില്‍ വെച്ചാണ് സംഘത്തെ പിടികൂടിയതെന്ന് യു.പി ഡി.ജി.പി ഒ.പി സിങ് പറഞ്ഞു.
മൗലാന മുഹ്സിന്‍ ശൈഖ്, റാഷിദ് പത്താന്‍, ഫൈസാന്‍ എന്നിവരാണ് അറസ്റ്റിലായത് . സംഭവ സ്ഥലത്ത് നിന്ന് ലഭിച്ച മധുരപലഹാര പെട്ടിയുമായി ബന്ധപ്പെട്ട് നടത്തിയ അന്വേഷണമാണ് പ്രതികളിലേക്ക് എത്താന്‍ പോലീസിനെ സഹായിച്ചത് . കേസില്‍ രണ്ട് പ്രതികള്‍ കൂടി അറസ്റ്റിലാകാനുണ്ട്.
അടുത്ത 24 മണിക്കൂറിനുള്ളില്‍ ഇവരെ പിടികൂടാന്‍ കഴിയുമെന്നാണ് പോലീസിന്റെ പ്രതീക്ഷ. പ്രവാചകനെതിരായി കമലേഷ് നടത്തിയ പരാമര്‍ശങ്ങളാണ് കൊലപടഹകത്തില്‍ കലാശിച്ചതെന്ന് പ്രാഥമികാന്വേഷണത്തില്‍ വ്യക്തമായി. കേസില്‍ തീവ്രവാദ ബന്ധമുള്ളതായി ഇതുവരെ തെളിയിക്കാന്‍ സാധിച്ചിട്ടില്ലെന്നും ഒ.പി സിങ് പറഞ്ഞു.
