ശാമലി(യുപി): ഉത്തര്‍പ്രദേശില്‍ ഉപതെരഞ്ഞെടുപ്പ് നടന്ന കൈരാനയിലെ 73 ബൂത്തുകളില്‍ ഇന്ന് റീപോളിംഗ് നടക്കുന്നു. വോട്ടിംഗ് യന്ത്രം തകരാറിലായതോടെയാണ് റീപോളിംഗ് വേണ്ടിവന്നത്. വിവിപാറ്റ് യന്ത്രമാണ് കേടായത്.
ശാമലിയിലെ അഞ്ച് ബൂത്തുകളിലും സഹാരണ്‍പുരിലെ 68 ബൂത്തുകളിലുമാണ് റീ പോളിംഗ് നടക്കുന്നത്. ബിജെപിക്കും പ്രതിപക്ഷ കക്ഷികള്‍ക്കും നിര്‍ണായകമായ ഉപതെരഞ്ഞെടുപ്പാണ് കൈരാനയിലേത്. പ്രതിപക്ഷ കക്ഷികള്‍ ഒന്നിച്ചാണ് മണ്ഡലത്തില്‍ ബിജെപിയെ നേരിടുന്നത്.
പ്രതിപക്ഷ ഐക്യത്തിന്‍റെ വേദികൂടിയാണ് കൈരാന. രാവിലെ വളരെ മന്ദഗതിയിലാണ് വോട്ടെടുപ്പ് പുരോഗമിച്ചത്. ആദ്യത്തെ രണ്ടു മണിക്കൂറുകളില്‍ 18.71 ശതമാനം പോളിംഗാണ് രേഖപ്പെടുത്തിയത്. വോട്ടെടുപ്പ് പൊതുവെ സമാധാനപരമായിരുന്നു.
