ന്യൂഡല്ഹി: കേന്ദ്ര സര്ക്കാരിനെതിരേ സിപിഎമ്മും അവിശ്വാസപ്രമേയത്തിന് നോട്ടീസ് നല്കി. പി. കരുണാകരനാണ് ലോക്സഭാ സെക്രട്ടറി ജനറലിനു നോട്ടീസ് നല്കിയയ്. സിപിഎം അവയ്ലബിള് പിബിയുടെ തീരുമാനത്തെ തുടര്ന്നാണ് നടപടി. ചൊവ്വാഴ്ച നോട്ടീസ് പരിഗണിക്കണമെന്നാണ് ആവശ്യം.
കഴിഞ്ഞ ദിവസം തെലുങ്കുദേശം പാര്ട്ടിക്കും വൈഎസ്ആര് കോണ്ഗ്രസിനും പിന്നാലെ കോണ്ഗ്രസും കേന്ദ്രസര്ക്കാരിനെതിരേ അവിശ്വാസപ്രമേയത്തിന് നോട്ടീസ് നല്കിയിരുന്നു. കോണ്ഗ്രസ് ലോക്സഭ കക്ഷി നേതാവ് മില്ലാകാര്ജുന് ഖാര്ഗെയാണ് ലോക്സഭ സെക്രട്ടറി ജനറലിന് നോട്ടീസ് നല്കിയത്. ചൊവ്വാഴ്ചത്തെ ലോക്സഭ നടപടി ക്രമങ്ങളില് അവിശ്വാസ പ്രമേയം കൂടി ഉള്പ്പെടത്തണമെന്നാണ് കോണ്ഗ്രസിന്റെ ആവശ്യം.
ആന്ധ്രയ്ക്കു പ്രത്യേക പദവി നിഷേധിച്ചതിനു പിന്നാലെയാണ് ടിഡിപിയും വൈഎസ്ആര് കോണ്ഗ്രസും കേന്ദ്രസര്ക്കാരിനെതിരേ തിരിഞ്ഞത്. ടിഡിപിയുടെ അവിശ്വാസ പ്രമേയത്തിന് കോണ്ഗ്രസ് ഉള്പ്പെടെയുള്ള പ്രതിപക്ഷ പാര്ട്ടികള് പിന്തുണ പ്രഖ്യാപിച്ചിരുന്നു. പ്രമേയത്തിന് അവതരണാനുമതി ലഭിക്കണമെങ്കില് 50 അംഗങ്ങളുടെ പിന്തുണ വേണം.
കഴിഞ്ഞ വെള്ളിയാഴ്ചയാണ് ടിഡിപിയും വൈഎസ്ആര് കോണ്ഗ്രസും അവിശ്വാസ പ്രമേയത്തിന് നോട്ടീസ് നല്കിയത്. എന്നാല് സഭാനടപടികള് ക്രമപ്രകാരമല്ല നടക്കുന്നതെന്ന് ചൂണ്ടിക്കാട്ടി സ്പീക്കര് ഇതുവരെ നോട്ടീസ് പരിഗണിച്ചിട്ടില്ല. ഈ സാഹചര്യത്തിലാണ് സിപിഎമ്മും നോട്ടീസ് നല്കിയിരിക്കുന്നത്.