ദേശീയപാതയിലെ തടസങ്ങള്‍ കാരണം കണ്ണൂര്‍ വിമാനത്താവളത്തിലേക്കുള്ള കണ്ടെയ്നറുകള്‍ക്ക് മാഹി കടക്കാനായില്ല. തിങ്കളാഴ്ച ഉച്ചയ്ക്കാണ് മാഹി അതിര്‍ത്തിയായ അഴിയൂരില്‍ പോലീസ് കാവലില്‍ എത്തിയ രണ്ടു കണ്ടെയ്നറുകളാണ് വഴിയില്‍ കുടുങ്ങിയിരിക്കുന്നത്.
മാഹി ഭാഗത്തെ പൂഴിത്തല മുതല്‍ മാഹി പാലം വരെയുള്ള റോഡിലെ തടസങ്ങളാണ് കണ്ടെയ്നറുകള്‍ വഴിയില്‍ കുടുങ്ങാന്‍ കാരണം. ലോറി ജീവനക്കാര്‍ മാഹി പോലീസിനെ ഇക്കാര്യം അറിയിച്ചെങ്കിലും തടസങ്ങള്‍ നീങ്ങിക്കിട്ടാത്തതിനാല്‍ കണ്ടെയ്നറുകള്‍ വഴിയില്‍ നിര്‍ത്തിയിട്ടിരിക്കുകയാണ്.
മാഹിയില്‍ ദേശീയപാതയിലെ സ്റ്റാച്യു ജംഗ്ഷന് സമീപം ജെ.എന്‍. ഹയര്‍ സെക്കന്‍ഡറി വിദ്യാലയത്തിന് മുന്നിലെ നടപ്പാതയുടെ കൈവരികള്‍ പൊളിച്ചു മാറ്റുകയും സമീപത്ത് തന്നെയുള്ള ഒരു വൈദ്യുതി തൂണും നീക്കം ചെയ്‌താല്‍ മാത്രമേ ലോറികള്‍ക്ക് കടന്നുപോകുവാന്‍ സാധിക്കൂ.
തടസങ്ങള്‍ നീക്കണമെന്ന് ആവശ്യപ്പെട്ട് ജീവനക്കാര്‍ മാഹിയിലെ സര്‍ക്കാര്‍ ഓഫീസുകള്‍ കയറിയിറങ്ങുകയാണ്. മാഹി പോലീസ് പച്ചക്കൊടി കാട്ടിയെങ്കിലും പൊതുമരാമത്ത് വകുപ്പും വൈദ്യുതി വകുപ്പും അനാസ്ഥ തുടരുകയാണ്.
കഴിഞ്ഞ മേയ് ഏഴിനാണ് കണ്ണൂര്‍ വിമാനത്താവളത്തിലേക്ക് എയ്റോ ബ്രിഡ്ജുമായി രണ്ട് കണ്ടെയ്നറുകള്‍ ചെന്നൈയില്‍ നിന്ന് പുറപ്പെട്ടത്.
