തിരുവനന്തപുരം: ലോകസഭാ തെരഞ്ഞടുപ്പില്‍ കേരളത്തില്‍ കോണ്‍ഗ്രസിന് ഉയര്‍ത്തിക്കാട്ടാന്‍ സാധിക്കുന്ന മികച്ച സ്ഥാനാര്‍ഥിയാണ് ഉമ്മന്‍ ചാണ്ടിയെന്ന് ആവര്‍ത്തിച്ച്‌ കെപിസിസി അധ്യക്ഷന്‍ മുല്ലപ്പള്ളി രാമചന്ദ്രന്‍. ഏതു സീറ്റില്‍ നിന്നാലും ഉമ്മന്‍ ചാണ്ടി മികച്ച ഭൂരിപക്ഷത്തില്‍ വിജയിക്കും. എംഎല്‍എമാര്‍ മത്സരിക്കരുതെന്ന് ഹൈക്കമാന്‍ഡ് തീരുമാനമെടുത്തിട്ടില്ലെന്നും അദ്ദേഹം പറഞ്ഞു.
അതേസമയം, ഉമ്മന്‍ ചാണ്ടിയുടെ സ്ഥാനാര്‍ഥിത്വം തള്ളാതെ ഹൈക്കമാന്‍ഡും രംഗത്തെത്തി. സ്ഥാനാര്‍ഥിത്വം സംബന്ധിച്ച്‌ അതാതു ഘടകങ്ങളുടെ നിര്‍ദേശം പരിഗണിക്കാറുണ്ടെന്ന് കേരളത്തിന്‍റെ ചുമതലയുള്ള എഐസിസി ജനറല്‍ സെക്രട്ടറി മുകുള്‍ വാസ്നിക് പറഞ്ഞു. ബൂത്തുതലം മുതല്‍ പ്രദേശ് കമ്മിറ്റികള്‍വരെ അഭിപ്രായം പരിഗണിക്കുമെന്നും അദ്ദേഹം കൂട്ടിച്ചേര്‍ത്തു.
