വയസായ പുരുഷന്മാരില്‍ മൂത്രാശയ പ്രശ്നങ്ങള്‍ സാധാരണയാണ്. 80 വയസായ പുരുഷന്മാരില്‍ 80ശതമാനം പേര്‍ക്കും എന്തെങ്കിലും തരത്തിലുള്ള മൂത്രാശയ പ്രശ്നങ്ങള്‍ കാണും. മൂത്രാശയ പ്രശ്നങ്ങള്‍ക്ക് പ്രാഥമികമായി മരുന്നുകള്‍ കൊണ്ടുള്ള ചികിത്സയാണ് നല്‍കുന്നത്. എന്നാല്‍, 29ശതമാനം പേര്‍ മാത്രമേ ഒരുവര്‍ഷത്തെ കണക്കെടുത്താല്‍ ചികിത്സയില്‍ തുടരുന്നതായി കാണാന്‍ കഴിയുന്നുള്ളൂ. ചികിത്സയെ ഫലപ്രദമായി കാണാത്തതുകൊണ്ടാണ് ഭൂരിപക്ഷം രോഗികളും ഇത് തുടരാത്തത്. പ്രോസ്റ്റേറ്റ് ഗ്രന്ഥി കാരണമുള്ള തടസം മാത്രമാണ് മരുന്നുകള്‍ മാറ്റുന്നത്.
എന്നാല്‍, മൂത്രാശയ പ്രശ്നങ്ങള്‍ മറ്റ് കാരണങ്ങള്‍ കൊണ്ടും ഉണ്ടാകാം. വയസാകുന്നത്, പ്രമേഹം, ഉറക്കത്തിന്റെ വ്യതിയാനങ്ങള്‍ മുതലായവ മൂത്രാശയ പ്രശ്നങ്ങള്‍ക്ക് കാരണമാവാം.രാത്രിയില്‍ രണ്ടുതവണയില്‍ കൂടുതല്‍ മൂത്രമൊഴിക്കേണ്ടി വരുന്നത് മൂത്രത്തിന്റെ വ്യതിയാനം കാരണമാകാം. രാത്രിയില്‍ ഉറക്ക പ്രശ്നങ്ങള്‍ കാരണം ഉണരുമ്ബോള്‍ മൂത്രമൊഴിക്കുന്നതിനായി അത് ഉപയോഗിക്കുന്നു. മറ്റൊരു കൂട്ടരില്‍ പ്രോസ്റ്റേറ്റ് ഗ്രന്ഥിയുടെ തടസംകാരണമുള്ള മൂത്രാശയ പ്രശ്നങ്ങള്‍ ഉറക്കത്തിന് തടസമാകുന്നു.
ഈ രണ്ട് വിഭാഗക്കാരിലും പകല്‍ സമയത്ത് ക്ഷീണം, പ്രമേഹം, ഹൃദ്രോഗം, മാനസിക പ്രശ്നങ്ങള്‍ തുടങ്ങിയവ ഇത് കാരണം ഉണ്ടാകുന്നു. അതിലൂടെ മൂത്രാശയ പ്രശ്നങ്ങളുള്ള രോഗികള്‍ക്ക് മേല്‍പ്പറഞ്ഞ അസുഖങ്ങള്‍ക്കും കൂടിയുള്ള ചികിത്സ ആവശ്യമാണ്.
ഉറക്കത്തിന്റെ തകരാറുകള്‍ രാത്രിയിലെ മാത്രമല്ല, പകല്‍ സമയത്തെയും മൂത്രപ്രശ്നങ്ങള്‍ക്ക് കാരണമാകും. രാത്രിസമയത്തെ മൂത്രമൊഴിവാണ് രോഗികളെ കൂടുതല്‍ അലട്ടുന്ന പ്രശ്നം. മരുന്നുകള്‍ കൊണ്ടും ശസ്ത്രക്രിയ കൊണ്ടും ഈ പ്രശ്നം പരിഹരിക്കുന്നത് വളരെ പ്രയാസമാണ്. ശസ്ത്രക്രിയ കൊണ്ട് 20 ശതമാനം പേര്‍ക്ക് മാത്രമേ രാത്രിയിലുള്ള മൂത്രമൊഴിവ് പരിഹരിക്കപ്പെടുകയുള്ളൂ.
സ്ലീപ് അപ്‌നിയ എന്ന വിഭാഗത്തില്‍പ്പെടുന്ന ഉറക്കപ്രശ്നം രാത്രിയിലെ മൂത്രമൊഴിവിന് കാരണമാണ്. ഈ ഉറക്കത്തകരാറിനുള്ള ചികിത്സയായ ബി.ഐ.പി.എ.പി ചെയ്ത രോഗികളുടെ മൂത്രാശയ പ്രശ്നങ്ങള്‍ക്കും ഒരു പരിഹാരം ആകുന്നുണ്ട്. അതിലൂടെ വയസായ പുരുഷന്മാരുടെ മൂത്രാശയ പ്രശ്നങ്ങള്‍ക്ക് പ്രോസ്റ്റേറ്റ് തടസത്തിനുള്ള മരുന്നുകളോടൊപ്പം പ്രമേഹം, ഉറക്കത്തകരാറുകള്‍, ഹൃദ്രോഗം, രക്തസമ്മര്‍ദ്ദം മുതലായ അസുഖങ്ങളുടെ ചികിത്സയും ഒരുമിച്ചു നടത്തിയാല്‍ മാത്രമേ മൂത്രപ്രശ്നങ്ങള്‍ക്ക് ഫലപ്രദമായ ഒരു ശമനം കിട്ടുകയുള്ളൂ.
