ന്യൂഡല്ഹി: ഇന്ത്യയില് കോവിഡ് വ്യാപനം രൂക്ഷമാകുന്ന സാഹചര്യത്തില് പൗരന്മാരെ നാട്ടിലെത്തിക്കാന് തയാറെടുത്ത് ചൈന. ഇതുസംബന്ധിച്ച അറിയിപ്പ് ചൈനീസ് എംബസി തിങ്കളാഴ്ച വെബ്സൈറ്റില് പ്രസിദ്ധീകരിച്ചു. നാട്ടിലേക്ക് മടങ്ങാന് ആഗ്രഹിക്കുന്നവര് പ്രത്യേക വിമാനങ്ങളില് മെയ് 27ന് ടിക്കറ്റ് ബുക്ക് ചെയ്യണമെന്നാണ് എംബസി അറിയിച്ചിരിക്കുന്നത്.
വിദ്യാര്ഥികള്, വിനോദസഞ്ചാരികള്, ബിസിനസുകാര് എന്നിവരെയാണ് പ്രത്യേക വിമാനം വഴി നാട്ടിലെത്തിക്കുന്നത്. നിരവധി ചൈനീസ് വിദ്യാര്ഥികള് ഇന്ത്യയില് പഠിക്കുന്നുണ്ട്. ബുദ്ധമത കേന്ദ്രങ്ങളിലും നിരവധി ചൈനക്കാരുണ്ട്. നാട്ടിലേക്ക് മടങ്ങാന് ആഗ്രഹിക്കുന്നവരെ പ്രത്യേകം പരിശോധന നടത്തും. രോഗലക്ഷണം ഇല്ലാത്തവര്ക്കു മാത്രമാകും യാത്രാനുമതി.
ഏതെങ്കിലും തരത്തിലുള്ള രോഗലക്ഷണങ്ങള് കാണിക്കുന്നവരെ ക്വാറന്റൈനിലേക്ക് വിടും. അതിനുശേഷമേ അവര്ക്ക് യാത്രയ്ക്ക് അനുമതിയുണ്ടാവുകയുള്ളൂ. രോഗാവസ്ഥ മറച്ചുവെച്ച് ആരും യാത്ര ചെയ്യരുത്. നിര്ദേശങ്ങള് കൃത്യമായി പാലിക്കണം. ലംഘിച്ചാല് കര്ശന നടപടിയുണ്ടാകുമെന്നും എംബസി അറിയിച്ചു.