ചെന്നൈ: മഹാബലിപുരത്ത് വെച്ച്‌ നടക്കുന്ന ഇന്ത്യ – ചൈന അനൗപചാരിക ഉച്ചകോടിക്കായി ചൈനീസ് പ്രസിഡന്‍റ് ഷീ ജിന്‍പിങ് ചെന്നൈയിലെത്തി. ഗവര്‍ണര്‍ ബന്‍വാരിലാല്‍ പുരോഹിത്, മുഖ്യമന്ത്രി എടപ്പാടി കെ. പളനിസ്വാമി എന്നിവരുടെ നേതൃത്വത്തില്‍ ഷീ ജിന്‍പിങിന് വന്‍ സ്വീകരണമാണ് നല്‍കിയത് . പാരമ്ബര്യത്തനിമയാര്‍ന്ന നാടന്‍പാട്ടും നൃത്തവുമായാണ് തമിഴകം ജിന്‍പിങ്ങിനെ വരവേറ്റത്.
എയര്‍ ചൈനയുടെ പ്രത്യേക വിമാനത്തിലാണ് അദ്ദേഹം എത്തിച്ചേര്‍ന്നത് . പ്രസിഡന്റിന് പ്രത്യേക സുരക്ഷയും സഞ്ചരിക്കാനുള്ള വാഹനമുള്‍പ്പെടെയുള്ളവ ചൈനയില്‍ നിന്നും വ്യോമമാര്‍ഗം എത്തിച്ചിട്ടുണ്ട്.ഇന്ത്യയും ചൈനയുമായുള്ള ബന്ധം കൂടുതല്‍ ഊഷ്മളമാക്കാന്‍ മഹാബലിപുരം ഉച്ചകോടിയിലൂടെ കഴിയുമെന്നും ഷീ ജിന്‍പിങ്ങിനെ വരവേല്‍ക്കുന്നതില്‍ സന്തോഷമുണ്ടെന്നും പ്രധാനമന്ത്രി നരേന്ദ്രമോദി പറഞ്ഞു. പൗരാണികനഗരമായ മഹാബലിപുരത്ത് വെച്ച്‌ ഇന്ന് വൈകിട്ടാണ് അനൗപചാരിക ഉച്ചകോടി നടക്കുക.
