ആധാറിന്‍റെ ഭാഗമായി ചേര്‍ക്കുന്ന ബയോമെട്രിക് വിവരങ്ങള്‍ എങ്ങനെയാണ് കുറ്റകൃത്യങ്ങള്‍ തടയുന്നതെന്നു സുപ്രീം കോടതി. കള്ളപ്പണവും തീവ്രവാദ പ്രവര്‍ത്തനങ്ങളും ഉള്‍പ്പെടെയുള്ള കുറ്റകൃത്യങ്ങള്‍ കണ്ടെ ത്തുന്നതിനും എതിരിടുന്നതിനും വ്യക്തികളുടെ വ്യക്തിഗതവും ബയോമെട്രിക് വിവരങ്ങളും എത്രമാത്രം സഹായകമാകുമെന്നും കോടതി സര്‍ക്കാരിനോടു ചോദിച്ചു. ആധാറിന്‍റെ നിയമസാധുത ചോദ്യം ചെയ്തുള്ള ഹര്‍ജിയില്‍ അഞ്ചംഗ ഭരണഘടന ബെഞ്ച് വാദം കേള്‍ക്കുന്നതിനിടെയാണ് കോടതി ഇക്കാര്യം ചോദിച്ചത്.
അതേസമയം, ആധാറുമായി ബന്ധപ്പെട്ട് നല്‍കുന്ന വിവരങ്ങള്‍ സുരക്ഷിതമാണെന്നും ദുരുപയോഗം ചെയ്യപ്പെടുന്നില്ലെന്നുമുള്ള ബോധ്യം പൗരനില്ലെന്നും വലിയ വീഴ്ചകള്‍ ഉണ്ടായിക്കൊണ്ടിരിക്കുകയാണെന്നും ഹര്‍ജിക്കാര്‍ക്കു വേണ്ടി മുതിര്‍ന്ന അഭിഭാഷകന്‍ കപില്‍ സിബല്‍ വാദിച്ചു. ഈ രഹസ്യ വിവരങ്ങള്‍ ഉപയോഗിച്ച്‌ സര്‍ക്കാര്‍ എന്തു ചെയ്യുമെന്നും ജനങ്ങള്‍ക്കു വ്യക്തതയില്ലെന്നും അഭിഭാഷകര്‍ ചൂണ്ടിക്കാട്ടി. വാദം അടുത്താഴ്ചയും തുടരും.
