ന്യൂഡൽഹി: സ്വകാര്യ ആശുപത്രികള് വാക്സിനേഷന് മാനദണ്ഡങ്ങള് ലംഘിച്ചാൽ നടപടിയുണ്ടാകുമെന്ന് കേന്ദ്രം. ആഡംബര ഹോട്ടലുകളുമായി ചേര്ന്ന് ചില സ്വകാര്യ ആശുപത്രികള് വാക്സിനേഷന് ക്യാമ്പുകള് നടത്തുന്നത് മാനദണ്ഡത്തിന് വിരുദ്ധമാണെന്നും ഇതിനെതിരേ നടപടി സ്വീകരിക്കുമെന്നുമാണ് മുന്നറിയിപ്പ്.
എല്ലായിടത്തും കൃത്യമായ മാനദണ്ഡങ്ങള് പാലിച്ചാണ് വാക്സിനേഷന് നടക്കുന്നതെന്ന് ബന്ധപ്പെട്ട അധികൃതര് ഉറപ്പുവരുത്തണമെന്നും സംസ്ഥാനങ്ങള്ക്ക് അയച്ച കത്തില് കേന്ദ്ര ആരോഗ്യമന്ത്രാലയം നിര്ദേശിച്ചു.
കേന്ദ്രം നല്കുന്ന നിര്ദേശങ്ങളനുസരിച്ച് ജോലി സ്ഥലങ്ങള്, വീടുകളുള്ള പ്രദേശങ്ങള്, കമ്മ്യൂണിറ്റി സെന്ററുകള്, സ്കൂളുകള്, കോളജുകള് എന്നിവിടങ്ങളില് വെച്ചായിരിക്കണം സര്ക്കാര്, സ്വകാര്യ ആശുപത്രികള് വാക്സിനേഷന് സൗകര്യമൊരുക്കേണ്ടതെന്നും കേന്ദ്ര ആരോഗ്യമന്ത്രാലയം വ്യക്തമാക്കി.