ഹൃദയാരോഗ്യത്തിനും പ്രതിരോധശക്തിക്കും ഏത്തപ്പഴംഹൃദയാരോഗ്യത്തിനു സഹായകമായ ഫലമാണ് ഏത്തപ്പഴം. അതില് സമൃദ്ധമായി അടങ്ങിയ പൊട്ടാസ്യം രക്തസമ്മര്ദം നിയന്ത്രിതമാക്കുന്നതിനു സഹായകമെന്നു പഠനം. മാത്രമല്ല സോഡിയം കുറവും. കാല്സ്യം, മഗ്നീഷ്യം, പൊട്ടാസ്യം എന്നിവ ഉള്ളതിനാല് ഏത്തപ്പഴം ബിപി നിയന്ത്രിതമാക്കുമെന്ന് ഗവേഷകര്. അങ്ങനെ ഹൃദയാഘാതം, സ്ട്രോക്ക്, മറ്റു ഹൃദയരോഗങ്ങള് എന്നിവയ്ക്കുളള സാധ്യത കുറയ്ക്കുന്നു. പൊട്ടാസ്യം കോശങ്ങളിലൂടെ ശരീരമെന്പാടും സഞ്ചരിക്കുന്നു. ഇത് തലച്ചോറിലേക്ക് ഓക്സിജനെത്തിക്കുന്നതിനു രക്തചംക്രമണ വ്യവസ്ഥയ്ക്കു സഹായകമാകുന്നു. ഹൃദയമിടിപ്പ് ആരോഗ്യകരമായ തോതില് നിലനിര്ത്തുന്നതിനും ശരീരത്തില് ജലത്തിന്റെ സംതുലനം നിലനിര്ത്തുന്നതിനും പൊട്ടാസ്യത്തിന്റെ സാന്നിധ്യം സഹായകം.
കൊളസ്ട്രോള് വരുതിയിലാക്കാം
ഏത്തപ്പഴത്തില് പെക്റ്റിന് എന്ന ജലത്തില് ലയിക്കുന്നതരം നാരുകളുണ്ട്. ഇവ ചീത്ത കൊളസ്ട്രോളായ എല്ഡിഎലിന്റെ തോതു കുറയ്ക്കുന്നതിനു സഹായകം. ഒപ്പം നല്ല കൊളസ്ട്രോളിന്റെ തോതു നിലനിര്ത്തുന്നതിനു സഹായകവുമാണ്.
വിളര്ച്ച തടയാം
ദിവസവും ഏത്തപ്പഴം ആഹാരക്രമത്തില് ഉള്പ്പെടുത്തണം. ഏത്തപ്പഴത്തില് ബി വിറ്റാമിനുകള് ധാരാളം. ഇവ നാഡികളുടെ പ്രവര്ത്തനം മെച്ചപ്പെടുത്തുന്നു. അതിലുളള പൊട്ടാസ്യം ബുദ്ധിപരമായ കഴിവുകള് ഉൗര്ജ്വസ്വലമാക്കി നിലനിര്ത്തുന്നതിനു സഹായകം. പഠനപരമായ കഴിവുകള് മെച്ചപ്പെടുത്തുന്നു. കുട്ടികളുടെ ദൈനംദിനഭക്ഷണക്രമത്തില് ഏത്തപ്പഴം ഉള്പ്പെടുത്തണം. വിറ്റാമിനുകളായ ബി6, സി, എ, ഡയറ്ററി നാരുകള്, ബയോട്ടിന്, കാര്ബോഹൈഡ്രേറ്റ്, മഗ്നീഷ്യം, സിങ്ക്, റൈബോഫ്ളാവിന്, മാംഗനീസ്, ഇരുന്പ് തുടങ്ങി ധാരാളം പോഷകങ്ങളുണ്ട് ഏത്തപ്പഴത്തില്.
വിളര്ച്ചാസാധ്യത ഒഴിവാക്കുന്നതിന് ഇരുന്പ് സഹായകം. ഇരുന്പ് ധാരാളമടങ്ങിയ മറ്റു വിഭവങ്ങള്ക്കൊപ്പം വിറ്റാമിന് സി അടങ്ങിയ ഏത്തപ്പഴവും ശീലമാക്കിയാല് ക്ഷീണം, തലവേദന, ശ്വാസം കിട്ടാതെ വരിക, ഹൃദയതാളത്തിലെ ക്രമരഹിതമായ അവസ്ഥ തുടങ്ങി വിളര്ച്ചയുമായി ബന്ധപ്പെട്ട ലക്ഷണങ്ങള് അകറ്റാം.
കണ്ണുകളുടെ ആരോഗ്യത്തിന്
കണ്ണുകളുടെ ആരോഗ്യത്തിനും ഏത്തപ്പഴം ഗുണപ്രദം.ഏത്തപ്പഴത്തില് വിറ്റാമിന് എ ധാരാളം. കൊഴുപ്പില് ലയിക്കുന്നതരം വിറ്റാമിനാണിത്. കണ്ണുകളുടെ ആരോഗ്യത്തിനും നിശാന്ധത ഒഴിവാക്കുന്നതിനും വിറ്റാമിന് എ അത്യന്താപേക്ഷിതം. പ്രായമായവരില് അന്ധതയ്ക്കുളള മുഖ്യകാരണമാണു മാകുലാര് ഡീജനറേഷന്. അതിനുളള സാധ്യത കുറയ്ക്കുന്നിന് ഏത്തപ്പഴം ഭക്ഷണക്രമത്തില് ഉള്പ്പെടുത്തണമെന്ന് പഠനങ്ങള് പറയുന്നു.
ആമാശയത്തിന്റെ ആരോഗ്യത്തിന്
ആമാശയ അള്സറിന് ഇടയാക്കുന്ന അസിഡിറ്റിയും തുടര്ന്നുണ്ടാകുന്ന നെഞ്ചെരിച്ചിലും മറ്റും ഒഴിവാക്കുന്നതിന് ഏത്തപ്പഴം ഗുണപ്രദം. സ്വാഭാവിക അന്റാസിഡ് ആയി പ്രവര്ത്തിക്കുന്നു. ആമാശയത്തിന്റെ ഉള്ഭിത്തിയില് പ്രത്യേക ആവരണം തീര്ത്ത് ആസിഡുകളില് നിന്നു സംരക്ഷണം നല്കുന്നതിനും ഏത്തപ്പഴം ഉത്തമം. ഏത്തപ്പഴത്തിലുളള പ്രോട്ടെയ്സ് ഇന്ഹിബിറ്റേഴ്സ് (protease inhibitors) ആമാശയ അള്സറിനിടയാക്കുന്ന ബാക്ടീരിയയില് നിന്നു സംരക്ഷണം നല്കുന്നു.
വിളഞ്ഞു പാകമായി പഴുത്ത നാടന് ഏത്തപ്പഴം മലബന്ധം കുറയ്ക്കുന്നതിനും ഫലപ്രദം. അതിലുളള ജലത്തില് ലയിക്കാത്ത തരം നാരുകള് കുടലിലൂടെ മാലിന്യങ്ങളുടെ നീക്കം എളുപ്പമാക്കുന്നു. വിഷപദാര്ഥങ്ങളെ ശരീരത്തില് നിന്നു പുറന്തളളുന്നതിനും ഗുണപ്രദം.
കുടലില് കാണപ്പെടുന്ന മിത്ര ബാക്ടീരിയകളുടെ വളര്ച്ചയ്ക്ക് ഉത്തേജകമായി ഏത്തപ്പഴത്തിലുളള ഫ്രക്റ്റോ ഒലിഗോസാക്കറൈഡ് പ്രവര്ത്തിക്കുന്നു. ദഹനരസം ഉത്പാദിപ്പിക്കുന്നതിനും പോഷകങ്ങളുടെ ആഗിരണത്തിനും അതു സഹായകം.
ദഹനശേഷി മെച്ചപ്പെടുന്നതിനും ഉപദ്രവകാരികളായ ബാക്ടീരിയകളെ തടയുന്നതിനും അതു സഹായകം. അതിസാരത്തെത്തുടര്ന്നു ശരീരത്തില് നിന്നു നഷ്ടമാകുന്ന ഇലക്്ട്രോലൈറ്റുകളെ തിരിച്ചുപിടിക്കുന്നതിനു സഹായകമായ ഭക്ഷണമാണ് ഏത്തപ്പഴം. അതിലുളള ജലത്തില് ലയിക്കുന്നതരം പെക്റ്റിന് നാരുകള് കുടലില് ദ്രവഭക്ഷണത്തിന്റെ ആഗിരണത്തിനു സഹായകം.
വൃക്കകള്, കുടലുകള് എന്നിവയിലെ കാന്സര്സാധ്യത കുറയ്ക്കുന്നതിന് ഏത്തപ്പഴം ഗുണപ്രദമെന്ന് പഠനം. അതിലുളള ആന്റി ഓക്സിഡന്റ് ഫീനോളിക് സംയുക്തങ്ങള് കോശങ്ങളില് അടിഞ്ഞുകൂടുന്ന ഫ്രീറാഡിക്കലുകളെ നിര്വീര്യമാക്കുന്നു.
അഴകുളള ചര്മത്തിന്
ചര്മത്തിന്റെ ഇലാസ്തിക നിലനിര്ത്തുന്നതിനു സഹായകമായ വിറ്റാമിന് സി, ബി6 തുടങ്ങിയ പോഷകങ്ങള് ഏത്തപ്പഴത്തില് ധാരാളം. ഏത്തപ്പഴത്തിലുളള ആന്റിഓക്സിഡന്റുകളും മാംഗനീസും ഫ്രീറാഡിക്കലുകളുടെ ആക്രമണത്തില്നിന്നു ചര്മകോശങ്ങളെ സംരക്ഷിക്കുന്നു. ചര്മത്തിന്റെ തിളക്കവും ചെറുപ്പവും നിലനിര്ത്തുന്നതിന് ഏത്തപ്പഴം പതിവായി ആഹാരക്രമത്തില് ഉള്പ്പെടുത്തുന്നതു ഗുണകരം. ഏത്തപ്പഴത്തില് 75 ശതമാനം ജലാംശമുണ്ട്. ഇത് ചര്മം ഈര്പ്പമുളളതാക്കുന്നു.
ഇടനേരങ്ങളിലെ ഭക്ഷണം
100 ഗ്രാം ഏത്തപ്പഴത്തില് ഏകദേശം 90 കലോറി ഉൗര്ജമുണ്ട്. കഴിച്ചയുടന് തന്നെ ഏത്തപ്പഴത്തിലുളള സ്വാഭാവിക പഞ്ചസാരകളായ സൂക്രോസ്, ഫ്രക്റ്റോസ്, ഗ്ലൂക്കോസ് എന്നിവ ഉൗര്ജമായി മാറുന്നു. കുട്ടികള്ക്കും മുതിര്ന്നവര്ക്കും പ്രഭാതത്തിലെ തിരക്കിനിടയിലും കഴിക്കാവുന്ന വിഭവമായി ഏത്തപ്പഴം ഉപയോഗപ്പെടുത്താം. കൂടാതെ ധാരാളം വിറ്റാമിനുകളും ധാതുക്കളും കാര്ബോഹൈഡ്രേറ്റുകളും ഏത്തപ്പഴത്തിലുണ്ട്.
കോംപ്ലക്സ് കാര്ബോഹൈഡ്രേറ്റും സിംപിള് കാര്ബോഹൈഡ്രേറ്റും അടങ്ങിയ അപൂര്വം ഫലങ്ങളിലൊന്നാണ് ഏത്തപ്പഴം. കോംപ്ലക്സ് കാര്ബോഹൈഡ്രേറ്റ് തുടര്ച്ചയായി ഉൗര്ജം തരുന്പോള് സിംപിള് കാര്ബോഹൈഡ്രേറ്റ് അതിവേഗം ശരീരത്തിന് ഉൗര്ജം ലഭ്യമാക്കുന്നു. രണ്ട് ഏത്തപ്പഴം കഴിച്ചാല് ഒന്നരണിക്കൂര് വ്യായാമത്തിനുളള ഉൗര്ജം നേടാം. ഇടനേരങ്ങളിലെ ഭക്ഷണമായും ഏത്തപ്പഴം കഴിക്കാം.
ഗര്ഭിണികള്ക്കും ഏത്തപ്പഴം
ഏത്തപ്പഴത്തില് കൊഴുപ്പു കുറവാണ്, നാരുകളും വിറ്റാമിനുകളും ധാരാളവും. അമിതഭാരം കുറയ്ക്കുന്നതിനു ഫലപ്രദം. അതിലുളള ബി വിറ്റാമിനുകള് ഭക്ഷണത്തെ ഉൗര്ജമാക്കി മാറ്റുന്നതിനും സഹായകം. ഗര്ഭിണികള് ഏത്തപ്പഴം ശീലമാക്കുന്നതു ഗര്ഭസ്ഥശിശുവിന്റെ ആരോഗ്യത്തിനു ഗുണപ്രദം.
ഏത്തപ്പഴം കഴിച്ചാല് വിഷാദഭാവങ്ങള് അകന്ന് ആഹ്ളാദകരമായ മൂഡ് സ്വന്തമാക്കാമെന്ന് പഠനങ്ങള് പറയുന്നു. അതിലുളള ട്രിപ്റ്റോഫാന് എന്ന പ്രോട്ടീനെ ശരീരം
സെറോടോണിനാക്കി മാറ്റുന്നതിലൂടെയാണ് ഡിപ്രഷന് അകലുന്നതെന്നു പഠനങ്ങള്.
എല്ലുകളുടെ കരുത്തിന്
നാഡീവ്യവസ്ഥയുടെ കരുത്തിനും വെളുത്ത രക്താണുക്കളുടെ നിര്മാണത്തിനും ഏത്തപ്പഴത്തിലുളള വിറ്റാമിന് ബി6 സഹായകം. പുകവലി നിര്ത്തുന്നവര് നേരിടുന്ന പിന്വാങ്ങല് ലക്ഷണങ്ങളില് നിന്ന്(നിക്കോട്ടിന് അഡിക്്ഷന്) മോചനത്തിന് ഏത്തപ്പഴത്തിലെ ബി വിറ്റാമിനുകളായ ബി6, ബി12, പൊട്ടാസ്യം, മഗ്നീഷ്യം ഗുണപ്രദം. മുടിയുടെ തിളക്കത്തിനും വളര്ച്ചയ്ക്കും മുടിയുടെ അറ്റം പൊട്ടുന്നതു തടയുന്നതിനും ഏത്തപ്പഴം ഗുണപ്രദം.
പ്രായമാകുന്നതോടെ എല്ലുകളുടെ കട്ടി കുറഞ്ഞു പൊടിയുന്ന ഓസ്റ്റിയോപൊറോസിസ് എന്ന എല്ലുരോഗം ചെറുക്കുന്നതിനും ഏത്തപ്പഴം സഹായകം. കാല്സ്യത്തിന്റെ ആഗിരണത്തിനും ഏത്തപ്പഴത്തിലെ പ്രോബയോട്ടിക് ബാക്ടീരിയ സഹായകം. കാല്സ്യം എല്ലുകള്ക്കു കരുത്തുനല്കുന്നു. ജൈവരീതിയില് വിളയിച്ച ഏത്തപ്പഴമാണ് ഉത്തമം. ഗുണം കൂടും.