ന്യൂഡല്ഹി: ശബരിമല സ്ത്രീ പ്രവേശനവുമായി ബന്ധപ്പെട്ട കേസുകള് ജനുവരി 22ന് കേള്ക്കില്ലെന്ന് സുപ്രീംകോടതി വ്യക്തമാക്കി. യുവതീപ്രവേശന വിധി പുറപ്പെടുവിച്ച ഭരണഘടനാ ബെഞ്ചിലെ ജഡ്ജി ജസ്റ്റീസ് ഇന്ദു മല്ഹോത്ര അവധിയിലായ പശ്ചാത്തലത്തിലാണ് മുന്നിശ്ചയ പ്രകാരം 22ന് കേസ് പരിഗണിക്കില്ലെന്ന് ചീഫ് ജസ്റ്റീസ് അറിയിച്ചത്.
ഇന്ദു മല്ഹോത്ര അവധി കഴിഞ്ഞ് തിരിച്ചെത്തുന്ന മുറയ്ക്ക് കേസ് കേള്ക്കുന്ന പുതിയ തീയതി നിശ്ചയിക്കും. ആരോഗ്യപ്രശ്നങ്ങളെ തുടര്ന്നാണ് ജസ്റ്റീസ് ഇന്ദു മല്ഹോത്ര അവധിയെടുത്തിരിക്കുന്നതെന്ന് ചീഫ് ജസ്റ്റീസ് രഞ്ജന് ഗോഗോയ് അറിയിച്ചു.
യുവതീപ്രവേശന വിഷയവുമായി ബന്ധപ്പെട്ട് അന്പതോളം റിവ്യൂ ഹര്ജികളും അഞ്ച് റിട്ട് ഹര്ജികളും മറ്റ് കോടതിയലക്ഷ്യ ഹര്ജികളുമാണ് സുപ്രീംകോടതിയില് എത്തിയിരിക്കുന്നത്. എല്ലാ ഹര്ജികളും ജനുവരി 22ന് തുറന്ന കോടതിയില് കേള്ക്കാമെന്ന് ചീഫ് ജസ്റ്റീസ് നേരത്തെ അറിയിച്ചിരുന്നു.
യുവതീപ്രവേശന വിധി പുറപ്പെടുവിച്ച ഭരണഘടനാ ബെഞ്ച് തന്നെയാവും ഹര്ജികള് പരിഗണിക്കുന്നത്. ചീഫ് ജസ്റ്റീസായിരുന്ന ദീപക് മിശ്രയ്ക്ക് പകരം നിലവിലെ ചീഫ് ജസ്റ്റീസ് രഞ്ജന് ഗോഗോയിയും ബെഞ്ചിലുണ്ടെന്ന മാറ്റം മാത്രമേയുള്ളൂ.
